E debate tocante un posible ley cu ta otorga derecho di matrimonio civil na pareha di mesun sexo, y e fuerte oposicion di entre otro gruponan religioso ta keda acapara atencion. Awor cu gobierno a anuncia cu a dicidi cu ta bay casacion cu e sentencia di Corte Comun di e Islanan, tabata necesario pa e partner junior di e gabinete di coalicion bin clarifica nan posicion. E partido semper tabata mantene un posicion na fabor di introduccion di tal derecho matrimonial, argumentando cu esaki ta pa cumpli cu trato igual pa tur individuo. Ta resulta awor cu nan no a apoya e decision di gabinete pa bay Hoge Raad cu e sentencia menciona, pero simplemente a keda ‘outvoted’ den seno di conseho di ministro. “Pero, esey ta democracia”, tabata loke e mandatario encarga cu entre otro Integridad a bisa den un rueda di prensa ayera. Por ta cu nos ta un poco ‘ingenuo’ (naief) pa a kere cu ta trata asunto a base di ‘consenso’ den e conseho superior di gobernacion aki, pero danki pa e coreccion…

En todo caso, e partido, ministro y parlamentarionan conhuntamente, a declara den e rueda di prensa menciona cu nan ta respeta e decision mayoritario pa bay casacion, tambe pasobra nan ta anticipando cu e ley di iniciativa na cual nan a contribui, lo keda trata proximamente den parlamento. E pensamento aparentemente ta cu si e ley keda aproba, esey lo haci e peticion di casacion excesivo. Cu esey, e partido ta desea di expresa cu nan “no a dobla” y ta keda para firmemente pa nan principio, cual ta di total apoyo di trato igual di tur persona, particularmente den e tema discuti aki.

Y cu esey, e asunto a termina felizmente? Nos ta kere cu no, pasobra tin hopi cos cu por sucede na caminda, si e speranza ta cu dentro di poco, pa luna di mei segun e partido, por trata e proyecto di ley den parlamento. Aki e promer interogantenan ta cuminza caba. Manera vocifera pa e partido junior, cada parlamentario supuestamente lo mester vota segun nan consenshi, y lo mester acepta e resultado di e votacion ey. Naturalmente esey ta e caso den tur votacion parlamentario, pero e experiencia ta cu den mayoria di caso no ta consenshi personal sino disciplina di partido ta manda. Aunke, manera señala den nos Editorial di 21 di februari, den aprobacion algun aña pasa di e cambio di ley pa acomoda e registracion di partnership di pareha di mesun sexo tabata necesario un coalicion unico di miembro di e dos fraccionnan grandi. Esey por sucede atrobe, pero na e momento aki no tin nada conoci ainda y ademas tin un cambio den composicion den Staten, pues lo mester tende di e parlamentarionan mes unda nan ta para den esaki.

Pero tin algo ta bisa nos pa no confia tanto cu dentro di un par di luna e deseo di e partido junior ta keda cumpli. Esey pa motibo di e manera di maniobra di e partido mayor den e coalicion. E pregunta ta esaki: si ta conveni e partido aki pa bay casacion, tambe pasobra esey ta yuda pa tene e grupo religioso, cu a base di nan principionan ta opone e introduccion di tal ley, contento pa basta tempo rumbo eleccion, pakico lo crea un situacion unda ta yuda aproba e ley y haya di tur manera e protesta di esnan contra awor caba, y despues bayendo pa eleccion? Ta facil pa bisa cu e rabia lo baha riba e parlamentarionan, cu lo a vota segun consenshi pero ta imaginable cu gobierno lo haya parti di e ‘fallout’ politico tambe. Pero, por tin otro scenario tambe. No ta bay tin un mayoria si ningun miembro di parlamento di e partner gubernamental grandi vota na fabor, suponiendo cu nunca tur miembro di e partido democrata cristian den oposicion ta bay vota na fabor. Y pakico esaki ta un posibilidad realistico? Pasobra e ta percura pa e partner junior no haya un exito parlamentario regala mientras cu e partner senior ta sufri un tipo di ‘derota politico’ cu nan defensa di e otro banda cu nan caso na Hoge Raad, cu lo keda colga. Envez cu por tene e gruponan religioso pa alrededor di dos aña cu e caso na Den Haag, pakico lo ‘give up’ e carta ey aki un par di luna?

Tambe ta importante pa tuma na cuenta cu, si nos analiza historia politico di ultimo decadanan, den caso di coalicion nunca e partido grandi ta gusta laga e partner menor logra victoria legislativo, pasobra esey por traduci su mes den ganashi electoral despues. Y den politica, semper ta trata di e siguiente eleccion. Por contempla e caso di e anterior gabinete, unda no a laga ni garnachi riba mesa pa e juniornan; djis puntra e anterior ministro encarga cu enseñanza pa su experiencia…

Kico tur esaki ta significa anto? Cu no ta nada sigur cu lo tin un ley aproba aki un par di luna, si acaso tin un tratamento di tal proyecto di ley. No mester lubida cu e tesoro di triki di retraso den parlamento no a ni subi mesa ainda. Esey tambe ta firmemente den man di e partner gubernamental grandi. Ta posible cu aki poco tempo nos mester conclui cu e partido junior tabata demasiado nobato y a kere cu asina facil nan ta bay ‘score’ politicamente, mientras cu e partner grandi a laga ‘democracia dicidi diferente’…

LJMADURO – 27-FEB-2023