Covid-19 tin un impacto grandi riba nos comunidad y economia. Gobierno ta haciendo hopi esfuerzo pa tene nos comunidad saludable y asina por minimalisa e impacto di Covid-19 riba nos salubridad publico. Di otro banda, pa e parti di nos economia nada ta wordo haci.
Gobierno ta bay fia y pidi como regalo 1.3 biyon florin, pa por cumpli cu salarionan di minister, parlamentario, ambtenaar y otro ‘trendvolgers’. Lo demas ta pa nan cuenta y tincu wak con nan ta salba nan mes. E Afl. 950 cu cual gobierno kier yuda pa 3 luna esnan cu bira desemplea of paga na empleadonan di empresanan cu mester cumpli cu un hala di requisito, no ta bay funciona pa por evita cu hopi di nos empresanan lo bati bancarota. De facto e sistema ta hinca asina den otro cu e uniconan cu lo por yega na haya sosten di gobierno ta esnan cu perde trabao y e empleador cu ta stop di existi.
Nos no mester inventa e wiel di nobo, nos tincu djis wak kico otro partnernan di Reino ta haciendo pa salba nan empresanan cu ta e motor di nan economía. Na Hulanda gobierno ta subsidia te 90% di gastonan di salario di empresanan y na e islanan BES te 80%. Dus no solamente salarionan di minister, parlamentario y ambtenaar ta sigui wordo paga, pero tambe di tur empleado. Tin un razon pakico nan ta haci esaki, pasobra despues di e pandemia aki, mester tin empresa pa start back bo economia. Un splicacion dicon gobierno di Aruba ta kere cu nos lo por hacie diferente nos no a haya ainda. E ta parce nos mas bien un “wishfull thinking”. E recien introduci plan di emergencia fiscal ta manera e dicho Hulandes: “Iemand blij maken met een dode mus”. Den lunanan venidero empresanan relaciona na turismo lo no tin ingreso o di casi cero (0). Dus haya un aplazamento di pago di un belasting cu bo no debe ta un cos di hari, den e caso aki mas bien di yora.
No tin duda cu Aruba a perde oportunidadnan valioso caba pa enfrenta e situacion cu nos ta aden. E escogencia ta den nos man y di nos lidernan, y lo tin un impacto grandi riba cuanto tempo ta bay tuma nos pa recupera nos economia. Nos gobierno hunto cu un parlamento uni y demas gremionan mester coincidi den e gravedad di e momento y acerca Hulanda cu un voz y pidi pa nos haya e mesun areglo cu e islanan BES. Como ultimo a bin un gesto di e parlamentarionan di Aruba cu ta sostene gobierno, den forma di un rebaho di salario cu ta mustra positivo, pero ta nada compara cu e centenares di miyones cu nos mester pa repara e daño haci. Pa contesta e pregunta ariba menciona, poco a wordo haci te awor, pero nos no ta laat ainda. Sin embargo e bentana ta cerando rapido riba nos, pues nos tin cu actua lihe.
