(AP) – Cualkier hende prestando atencion durante e verano aki di “sobreturismo” ta familiar cu e consecuencianan escalante rond mundo: trafico pisa den paraiso, reportahenan di trahadornan den hospitalidad bibando den tent y protestanan “anti-turismo” diseña pa bergonsa bishitantenan mientras nan ta cena—of na Barcelona na juli, muha nan cu pistol di awa.
E protestanan ta un ehempel di localnan usando e poder di cantidad y red social pa duna lidernan di destinacion un ultimatum: Maneha e problema aki miho of nos lo core cu tur turista—ken por gasta nan 11.1 triyon dollar pa aña otro caminda. Prijsnan di vivienda, trafico y maneho di awa tur ta riba lista.
Pero kico ta “sobreturismo”?
E frase mes ta describi en general e punto di limite na cual bishitantenan y nan placa ta stop di beneficia residentenan y ta causa daño por medio di degrada sitionan historico, pone presion riba infrastructura y haci bida mas dificil pa esnan cu ta biba eynan.
E ta un ‘hashtag’ cu ta duna un nomber na e protestanan y hostilidad cu nos a mira e temporada aki di verano. Pero un bista mas profundo lo mustra problemanan mas complica pa localnan y nan lidernan, ningun mas universal cu e prijsnan di vivienda mas caro causa pa e casnan rental manera Airbnb, for di Spaña pa Sur Africa. Algun local ta curashando “turismo di calidad,” generalmente defini como teniendo mas consideracion pa residente y menos comportamento burachi, tumamento di potret disruptivo of otro comportamento cuestionable.
“Sobreturismo ta argumentalmente un fenomeno social tambe,” segun un analisis for di e World Trade Organization skirbi pa Joseph Martin Cheer di Western Sydney University y Marina Novelli di University of Nottingham. Na China y India, por ehempel, nan a skirbi, luganan druk ta socialmente mas acepta. “Esaki ta sugeri cu expectativanan cultural di espacio persona y expectativanan di exclusividad ta diferente.”
E temporada di verano aña pasa a ser defini pa e caos di e biahe mes—aeropuerto y aerolineanan druk, y cuenta di paspoort un pesadiya pa biaheronan for di Merca. Pero pa fin di e aña, señalnan tabata mustra cu e aumento di biahe pa compensa e pandemia di COVID-19 tabata acelerando.
Na januari, e agencia di turismo di e Organisacion di Nacionnan Uni (ONU) a pronostica cu turismo mundialmente lo sobrepasa e record crea na 2019 cu 2 porciento. Pa fin di maart, e agencia a reporta, mas cu 285 miyon turista a biaha internacionalmente, aproximadamente 20 porciento mas compara cu e prome kwartaal di 2023.
Fuera di e placa, tabatin mas problema den paraiso e aña aki, cu Spaña hungando un rol den tur cos for di problemanan di maneho di awa pa prijsnan halto di vivienda y drama di turistanan burachi.
Protestanan a surgi den e pais na maart, ora graffiti na Malaga a urgi turistanan pa “bay bo f— cas.” Miles di manifestantenan a protesta den e Islanan Canarias na Spaña contra bishitantenan y construccion cu tabata pone demasiado presion riba servicionan di awa y hisando prijsnan di vivienda. Na Barcelona, manifestantenan a bergonsa y a muha hende supuestamente riba bishita mientras nan tabata cenando den area turistico di Las Ramblas.
Michael O’Regan, un profesor di turismo y eventonan na Glasgow Caledonian University, ta argumenta cu “sobreturismo a bira un palabra popular cu no ta refleha e hecho cu e experencia ta depende mayormente riba e exito of fracaso di maneho di turismo. Ta berdad cu hopi di e protestanan no ta contra turismo mes, pero contra lidernan cu ta permiti pa e localnan, ken mester ta esnan pa beneficia, sufri pa esaki.
“Tin un lucha global pa turista. Nos no por ignora esey…Pues kico ta pasa ora nos haya demasiado turista? Destinacionnan mester haci mas investigacion.”
