Un demanda entrega diahuebs ta acusa Instagram di usa camara di iPhone pa spiona riba hende. E problema ta parce relaciona cu un ‘bug’ descubri na juli, tempo cu Facebook a bisa cu e app no ta usa e camara di berdad, maske software di Apple, iOS 14 tabata indica cu si.
“Instagram constantemente ta evaluando e capacidad di camara di smartphone di usuarionan mientras e app ta habri, y ta monitor su usuarionan sin permiso”, segun e demanda, entrega den corte di districto di San Francisco, pa usuario di Instagram Brittany Conditi di estado di New Jersey.
Instagram y su doño, Facebook, ‘tabata capaz di monitor e momentonan mas intimo di su usuarionan, incluyendo esunnan den e privacidad di nan propio cas, ademas di colecta revelacionnan valioso y investigacion di mercado riba nan usuarionan’, segun e demanda.
Facebook a nenga di comenta riba e demanda. Pero na juli a bisa cu e notificacion di uso di camara cu e usuarionan di iPhone a mira tabata un ‘bug’ (un eror di software). “Nos no tin acceso na bo camara durante e instancianan en cuestion, y no ta graba ningun contenido”, Facebook a bisa The Verge.
Camaranan ta esencial pa comparti momentonan cu contactonan social, pero e tecnologia ta bin cu riesgo. Na 2019, usuarionan a haya cu e app di Facebook a cende nan camaranan, otro ‘bug’. Pero hendenan preocupa por tuma medidanan mas fuerte cu djis depende riba software pa haci loke e ta supone di haci. Na aña 2016, un video a revela cu hefe ehecutivo di Facebook, Mark Zuckerberg ta tapa e camara di su laptop cu tape.
