MIAMI (Univision) – Den ultimo dos aña, aparentemente e regimen Castrista a encarga su mes cu saca disidente y activista cu ta protesta contra gobierno for di e isla, y tin aerolinea presuntamente involucra den cooperacion cu esaki. Abogado Kivaki Law Firm a sigura cu nan tin testimonio di 77 persona afecta, di cual 35 a keda expulsa di Cuba.

Disidentenan Cubano na e isla ta denuncia cu e regimen Cubano ta ofreciendo nan placa pa nan bay di e isla y si nan no haci esey ta menasa nan cu morto. Asina representantenan di e exiliadonan Cubano a denuncia den un rueda di prensa na Miami, unda a anuncia tambe un demanda den corte na Florida contra por lo menos un di e aerolineanan cu lo ta colaborando cu autoridadnan Cubano como complice den e operacion ilicito aki di forsa e Cubanonan aki den exilio.

Asina aki gobierno di Cuba ta deshaci di esunnan cu ta halsa nan bos contra gobierno Cubano, pa aparenta cu tur cos ta normal. Den esaki tin aerolinea cu ta bula riba Cuba y cu ta coopera den e expatriacion forsa aki, entre nan uno di Guyana y otro Venezolano. Den un entrevista cu a sali publica na Univision e abogado Maria Herrera ta splica con en realidad e operacion di expulsion aki ta tumando luga. E disidentenan cu e regimen ta considera cu no por reeduca ta haya anuncia cu lo ta bay tin un posibel investigacion contra nan y ta haya e oferta pa sali di e pais den forma di expatriacion sin posibilidad di retorno.

E papel di e aerolineanan cu lo ta colabora den e operacion aki ta di acepta e personanan aki, cu no ta subi hunto cu e otro pasaheronan, sino separadamente for di e rampa, y ta hiba nan pa otro pais. Ta bisa tambe cu e tripulacion di e avionnan ta testigo di tur esaki pero no por haci nada. E paisnan menciona como prome pais di aterisahe despues di sali di Cuba lo ta Guyana, Trinidad & Tobago y Nicaragua. Despues lo ta laga e personanan aki pa nan cuenta. Ta denuncia tambe cu e meta di gobierno Cubano ta pa demostra cu no tin oposicion na e pais.

Un compania cu ta menciona den e reporte ta Aruba Airlines, contra cual lo tin demanda den corte tambe. Den un entrevista cu un persona di gerencia di Aruba Airlines na Miami esaki a declara cu e aerolinea no ta na altura di tur esaki, cu no tin ningun vinculo cu gobierno di Venezuela, manera abogadonan di e disidentenan cu a cuminsa e caso ta bisa, salvo e US$ 40 miyon di debe cu gobierno di Venezuela tin cu e compania ainda.

Redaccion di Bon Dia Aruba a trata di drenta den contacto cu gerencia di Aruba Airlines na Aruba, pa eventualmente ricibi algun comentario di nan banda, pero no tabata posibel alcansa gerencia durante dia di ayera.