Mega Corona Compensation Foundation kier trece gobierno Chines dilanti hues na Aruba, Corsou y Sint Maarten pa exigi compensacion pa individuonan y companianan riba e islanan cu a sufri pa via di e pandemia. Nan lo bay usa un ‘class action lawsuit’, un demanda colectivo, algo cu ya nan bufete colaborado ta logrando na Merca.
Den entrevista cu e abogado cu ta colaborando cu e fundacion, Gabri de Hoogd, kende ta eherce su profesion na bufete James Martin, e abogado a splica cu e meta di e fundacion ta pa logra ricibi un compensacion pa e efecto cu e pandemia tabatin na cada isla den Reino Hulandes.
Personanan y companianan interesa por registra riba nan website https://megacoronacompensation.org/ pa 45 florin y 135 florin respectivamente, cual ta e suma necesario pa haci administracion di produccionnan cu lo bay usa pa comproba perdida.
De Hoogd ta conta Bon Dia cu ta practicamente irefutabel cu e pandemia aki a bin pa via di negligencia di gobierno Chines, mirando cu e prome casonan a origina na Wuhan, China. E fundacion ta convenci cu nan por trece gobierno Chines dilanti huesnan di cada isla, mirando cu e mesun desaroyo ta pasando na Merca, unda nan partner, e bufete Berman Law Group, ta logrando cu nan class action lawsuit. De Hoogd a indica cu esaki ta pasobra cu e mesun desaroyonan den hurisprudencia Mericano cu ta haci esaki posibel aya, lo haci esaki posibel na e islanan tambe, mirando cu e sistema Hulandes a conoce desaroyonan similar.
Individuo y compania cu registra so lo haya compensacion
E abogado ta subraya cu ora cu nan logra haya un ‘settlement’, cual ya Berman Law a logra, solamente e personanan cu a registra cu e fundacion lo por bin na remarca pa compensacion. E fundacion den e caso aki ta lanta como un fundacion cu tin e metanan di representa personanan cu a sufri daño den nan statuto, cual ta haci cu nan por lanta un caso class action contra otro entidad.
E desaroyo di demanda colectivo ta algo interesante, pasobra segun nos conocemento, ni tampoco di e abogado, a yega di usa esaki den nos sistema hudicial.
Cuestion di ‘inmunidad’ di estado Chines lo ta central den demanda
Un di e aspectonan clave den e caso cu e fundacion lo lanta, ta e contesta riba e pregunta si un entidad na un pais por hiba otro pais of su entidadnan publico dilanti hues di e pais unda e ta residencia of registra. Anteriormente, tabat’e caso cu un entidad no por hiba un otro pais dilanti un corte stranhero. Esaki, sinembargo ta bin ta cambiando, segun De Hoogd.
De Hoogd a expresa cu maske cu Aruba, Corsou y Sint Maarten ta un parti chikito di mundo, esaki no ta kita cu personanan y companianan riba e islanan no a sufri pa via di negligencia di estado Chines. Pues si den e demanda colectivo e fundacion logra establece cu gobierno Chines ta responsabel pa nan negligencia, esaki lo nifica cu nan lo mester ‘settle’ pa paga un suma na e fundacion, cual nan lo bay distribui na esunnan cu a registra cu nan.
