E aerolineanan Mericano Delta y American Airlines ta bay aumenta nan frecuencia di vuelo pa Boneiro durante e temporada di winter.
Despues di un periodo largo sin hopi actividad turistico, e dos aerolineanan Mericano, Delta y American Airlines riba 5 di juni 2021 a reanuda nan operacion di vuelo pa Boneiro. E dos aerolineanan ta bulando dos biaha pa siman riba diaranson y diasabra pa nos isla. Recientemente a anuncia cu Delta ta bay aumenta nan vuelonan pa Boneiro y for di 18 di december 2021 pa 2 di januari 2022 Delta tin vuelo diario pa Boneiro for di Atlanta, Georgia.
American Airlines tambe a participa nan aumento di vuelo for di Miami, Florida pa Boneiro. Pa motibo di e demanda halto cu tin American Airlines ta aumenta su vuelonan pa 3 biaha pa siman añadiendo un vuelo extra riba dialuna. Actualmente riba diasabra American Airlines ta uza e tipo di avion Airbus A319 pero den luna di october nan ta cambia esaki pa un Boeing 737. Esaki ta bay contribui cu 44 stoel mas cu por bende. Finalmente American Ailrines lo aumenta su vuelonan durante e periodo di fin di aña tambe pa vuelonan diario cuminsando 16 di december 2020 pa 3 di januari 2022.
Aumento di e vuelonan ta parti di e “Tourism Recovery Plan”. Nos a haci hopi esfuerso pa por recupera e mercado Mericano mirando cu esaki ta uno hopi importante pa e sector turistico di Boneiro. E mercado aki ta uno cu ta gasta mas cu averahe riba nos isla y nos ta mira potencial pa e mercado aki sigui desaroya pa por sigui beneficia for di dje”, segun diputado di turismo Hennyson Thielman.
Por pronostica e periodo binidero como uno druk, caminda comerciante nan den e sector di turismo por bay spera movecionnan economico positivo riba nos isla. Esaki ta resultado di e inversionnan cu a haci den team di mercadeo na Merca pa expone y posishona nos isla miho y tambe di e colaboracion entre Tourism Corporation Bonaire, Bonaire International Airport y gobierno di Boneiro. E logro aki ta forma parti di “Tourism Recovery Plan” y ta confirma e recuperacion rapido di e industria.
