Delta Airlines a haci ultimo vuelo pa Venezuela

E aerolinea Mericano Delta Airlines a realisa su ultimo vuelo desde Maiquetia pa Atlanta, Estadonan Uni, riba diasabra 16 di september.

E trahadornan a despedi di Venezuela cu pancarta riba cual por a les “Libertad ta e origen di e alma. Nos ta spera di bolbe.” E piloto a zwaai cu bandera Venezolano prome cu salida di e avion.

Na luna di juli ultimo e empresa aereo a emiti un comunicado den cual e tabata splica cu e suspension di su operacion na e pais ta debi na e “condicionnan instabil di e mercado.” Riba su cuenta di Twitter, e aerolinea a informa cu su ultimo vuelo lo tabata dia 16 di september.

Den e ultimo tres aña a bay di e pais dies aerolinea: Delta Air Lines, Avianca, Air Canada, Alitalia, GOL, Tiara Air, Lufthansa, Latam, Aeroméxico y United Airlines.