Crisis den prizon no ta duna tregua na Brasil. Como 11 prizonero a huy diamars for di un prizon na ciudad di Goiania, despues cu nan complicenan a bula un muraya cu tabata separa e prizon di un cas bisiña cu explosivo, fuentenan oficial a informa.
E huymento a tuma lugar den oranan tempran di mainta na prizon di Guapo, municipio den area metropolitano di Goiania, capital di Goias, na centro di Brasil, un comunicado di superintendencia regional di Administracion penitenciario a detaya.E explosion a origina un huymento masal cu a laga 6 prizonero herida y un cas totalmente destrui, pasobra e cas a ser invadi pa e grupo di delincuente, ora cu nan tabata ehecuta nan operacion.Gobierno di Goias a tuma medida di emergencia, pa asina move 6 prizonero herida pa hospital y un grupo di 60 prizonero pa otro prizon.
Polis a informa cu e grupo di delincuente a yega te den un cas banda di e prizon, den dos auto. Suhetonan a invadi e cas y prome cu nan a core pa huy for di e lugar, nan a pone algun explosivo na e murayanan. Un bisiña residente di e cas cu a explota a keda herida tambe.Ocho dia pasa, otro dos prizonero a muri y 30 prizonero a huy for di un prizon di Sao Luis, capital di estado di Maranhao (noroeste), despues cu un di e murayanan di e prizon a ser bula cu explosivo.
Siman cu a pasa como 90 prizonero a huy via un tunnel di mas di 30 meter di largura for di un prizon na estado di Río Grandi do Norte (noroeste).
E gran cantidad di prizonero y condicion malo den prizon ta algun di e problemanan clave cu e sistema di prizon na Brasil tin. Brasil tin den su prizon 654.372 prizonero, un cantidad cu ta supera cu 76 % su capacidad normal, segun dato oficial.
Brasil a pasa den un di su pio crisis den prizon na cuminsamento di 2017, despues cu varios prizon di estado manera Amazonas, Roraima y Río Grandi do Norte a registra enfrentamento entre prizonero di varios grupo criminal, cu a laga un saldo di 150 morto.
