Recientemente ariba rednan social por a mira un cantidad grandi di persona cu ta publica pidiendo ayudo di comunidad pa busca nan vehiculonan cu a ser horta.
Mas y mas persona ta recoriendo na e diferente tipo di rednan social y gruponan cu nan ta pertenece na dje ariba e mesun rednan social aki pa haci un yamado na e conciudadanonan pa yuda un poco den e casonan lamentabel aki.
Delincuentenan ta den un racha di hortamento di tanto auto como brommer. Apenas siman pasa un minimo di cinco persona a haci publicacion den buskeda di nan auto cu a ser horta.
Ciudadanonan ta comenta ariba e publicacionnan aki y ta vocifera nan preocupacion y ta puntra ta kico ta pasando y unda e autoridadnan local.
“Dicon tin tanto auto cu ta wordo horta? Kico ta pasando? Tin un gang cu ta hopi activo y tin un racha di horta auto. Unda polis a keda? Dicon no ta haci nada of no ta sali bisa nada,” un usuario a comenta.
Algun usuario ta remarca tambe cu ta e mesun marca di auto cu ta wordo horta frecuentemente. Ariba esaki un otro usuario a comenta: “Esaki ta e mesun ladron cu ta hortando e kianan. Polis no ta pensa di haci un investigacion?”
Mientras tanto otro ta indica cu e delincuentenan aki ta horta e autonan, specialmente e marca popular, pa desmantela e auto completamente y bende e piesanan. P’esey mes hopi biaha e autonan aki no ta aparece y si nan aparece mes, nan no ta den bon condicion of ta falta piesanan importante.
Hopi ciudadano ta tumando accion di prevencion den nan man y asina nan wak personanan sospechoso no conoci canando den nan bario nan ta alerta otro cuidadonan di e mesun bario a traves di rednan social pa nan ta pendiente y tene cuenta pa nan no pasa den mesun situacion fastioso aki.
Te ainda ningun comunicado ni informacion a wordo publica of comparti for di KPA informando comunidad di e racha aki, ni pa nan tene cuidao cu e delincuentenan aki.
