ORANJESTAD— Diasabra ultimo tabatin un segundo aglomeracion di personanan Venezolano na Plaza Bolivar, unda ta duna danki na Union Europeo pa duna regimen di Nicolás Maduro un ultimatum di 8 dia pa tene eleccionnan legitimo, cu consecuencia di sostene y reconoce Juan Guaidó como e presidente legitimo di nos pais bisiña.

E evento, cu tabata segun un di e organisadonan mas bien un celebracion, ta pa asina mustra nan gradicimento na Union Europeo pa a tuma un stap pa cuminsa reconoce presidente interino, Juan Guaidó, como e presidente legitimo di Venezuela. Mientras Gaita tabata toca y pueblo Venezolano bibando na nos isla tabata canta e himno di e pais Caribense, varios personanan presente a duna nan opinion riba kico un posibel mehoracion den situacion di Venezuela lo nifica pa Aruba.

Un persona ta corda cu antes den añanan cu Venezuela tabata anda bon, tabatin hopi bon intercambio entre nos isla cu Venezuela, mirando cu den e tempo ey tabata considera e turista Venezolano como e grupo di turista cu ta e di dos mas grandi, banda di Mericano. “Awo cu e tragedia aki cu a pone pueblo Venezolano sufri, tur loke ta malo di Venezuela ta bin aki na Aruba. Pero na momento cu Venezuela su situacion drecha, bo lo wak cu tur e ilegalnan cu ta aki na Aruba lo bay bek na nan pais y nos lo bay bek na ta un Venezuela prospero.”

Luis Zarraga, kende tabata promotor di e ultimo evento plania na Paseo Herencia, a conta di su banda con e situacion di Venezuela ta bin ta afectando Aruba masha hopi mes, pasobra e isla no ta prepara pa ricibi tanto migrante manera cu ya caba ta e caso. “Nos sigur ta compronde e esfuerso cu no solamente gobierno, sino pueblo Arubano, ta haciendo pa tuma tanto migrante, mirando cu ta un ola migratorio cu ta afecta henter e region.”

Delgado: gobierno por mira potencial den e Venezolano honesto
Durante e evento, e figura famoso di Venezuela, Maite Delgado, tambe a presenta pa mustra su sosten na e evento aki cu Fundacion Venezuela Uni a organisa. Den un entrevista cu nos periodista el a contesta e pregunta riba con e ta pensa cu Aruba como isla chikito por yuda Venezuela den e situacion dificil cu e ta pasando y cu e lo sali di dje cu speransa.

“Mi ta stima Aruba hopi, no di awo, sino di hopi tempo caba. Y na Aruba mi tin interesnan di cuida. E isla aki tabata hopi generoso cu mi y mi semper lo gradici Aruba pa esaki. Mi ta sinti mi mes den gran parti un yiu di e tera aki tambe. Sinembargo, mi sa cu Aruba — pa via di miedo, cual ta algo hopi natural, mirando e comunidad di poco mas cu 100 mil persona — ta hopi fragil. Den tur sentido, sea cu ta turistico, economico, ecologico, Aruba mester proteccion. Esaki mes mi kiermen ora mi bisa cu e Venezolanonan cu bin no ta bin aki pa daña e pais. E problema ta cu ora nos ta invisibel y ora ta nenga di brinda oportunidad di traha, nos lo por causa problema sin tabata kier a haci esaki.”

“Ami como representante di comunidad Venezolano kier pidi gobierno di Aruba su solidaridad y humanidad, pero tambe pa e wak nos comunidad di Venezolano cu wowo di interes. Pa e wak e potencial den e Venezolano honesto cu talento. Mi lo sugeri pa haci un tipo di Censo, pa asina haya sa kende nos ta, cuanto nos ta, kico nos tin. Asina bo por bisa tambe, si bo tin un record criminal y bo no por bin cu papel di bon conducta, bo ta bisa di biaha sorry, nos no tin mester di bo awo, pasobra nos comunidad ta mucho chikito pa ricibi bo y rehabilita bo. Pero tambe por bin ingeniero, dokter, of otro obrero cu por aporta algo cu un oportunidad. E ora ey, scoge un cantidad di persona di e lista ey cu bo ta compila, y duna mi 3 luna, 6 luna y evalua mi trabou! Mi no sa. Habri e porta, pa asina mi demostra kico ami tambe lo kier pone riba mesa pa Aruba.”