(NLTimes)—E municipio di Delft a pidi despensa pa e pasado di sclavitud di e ciudad. Alcalde Marja van Bijsterveldt a declara diamars anochi cu e conseho di ciudad no ta cera su wowo pa e pasado y e envolvimento di su antecesornan. “Nos ta sigui den e caminda di nos antecesornan. Pa nan accionnan, nos ta ofrece nos disculpa awe,” el a bisa.
Na Delft, ambos e Oost y West Indische Compagnie tabatin oficina. Y e lidernan di companianan di comercio VOC y WIC tambe a hunga un rol den e gobierno di Delft. “A pasa mas cu 200 aña desde cu e barconan ey a nabega mundo. E efectonan ainda ta visibel den e ciudad. Algun casnan a ser construi cu ganashi for di sclavitud,” van Bijsterveldt a bisa.
Segun e alcalde, tur hende na Delft e tempo ey tabata sa cu sclavitud tabata existi. Investigacionnan conduci na comienso di aña a indica cu e ciudad a beneficia for di e comercio di hende sclavisa y e trabao cu nan tabata forsa pa haci. Dentro y rond e ciudad, mansion- y villanan caro a ser construi, y algun residente e bira hopi rico. “E investigacion ta subraya e periodo cu a forma nos ciudad,” e alcalde a agrega.
Delft ta globalmente conoci pa Delft Blue, “pinturanan di clase global y un relacion cercano cu e famia Real,” segun van Bijsterveldt. Sinembargo, banda di e aspectonan bunita aki, e historia di e ciudad tambe tin un banda mahos, manera el a nota. “Nos a reconoce esaki completamente den pasado of no tabata kier a reconoce su impacto.”
Prome minister demisionario Mark Rutte y Rey Willem-Alexander a pidi despensa pa e pasado di sclavitud na Hulanda, manera otro muncipio y banco tambe a haci. Exactamente un aña pasa, Rutte a pidi despensa pa “e accionnan di e estado Hulandes den pasado.”
