Aruba lo ricibi bishita di un delegacion di 13 miembro di e comision fiho di Relacionnan den Reino di Eerste Kamer, KOREL di 4 pa 5 di Maart proximo. E delegacion bao liderazgo di e Presidente di KOREL, Sr. Paul Rosenmöller, ta realisando un bishita di trabao na e parti Caribense di Reino Hulanda. E delegacion a inicia su bishita ayera Diabierna, y lo bolbe Hulanda dia 6 di Maart.

E delegacion ta bishita tanto Corsou, St. Maarten y Aruba como e entidadnan publico Saba, St. Eustatius y Boneiro.

Meta di e bishita ta pa e delegacion KOREL ricibi informacion di su partnernan den Caribe tocante asuntonan cu ta importante pa e islanan. Pa e Senadornan Hulandes, e combersacionnan ta fungi como profundisacion di e pakete di ley cu Senado Hulandes, esta Eerste Kamer sea ta tratando of ta bay trata. Alabes, e bishita tin como meta pa fortifica lasonan den Reino.

E bishita ademas ta duna e voceronan di e fraccionnan chikito y mediando di Eerste Kamer e oportunidad pa cera conoci personalmente cu e parti Caribense di Reino. Esaki mirando cu normalmente nan no ta forma parti di e delegacion di ‘Staten Generaal,’ cu ta consisti di miembronan di Eerste y Tweede Kamer cu ta participa na IPKO, esta e Interparlamentair Koninkrijksoverleg, cu ta tuma luga cada seis luna.

Durante nan bishita, e miembronan di Eerste Kamer lo hiba combersacionnan entre otro cu Gobernador, Gobierno, ademas di representantenan di pueblo, esta Parlamentarionan. Pero tambe nan lo reuni cu organisacionnan di dunadonan di trabao, empresarionan, personanan y organisacionnan den e cadena hudicial, organisacionnan di consumidor, hobennan y otro.

E bishita a inicia na St. Maarten, despues lo sigui pa Saba, St. Eustatius, Boneiro, Corsou y lo conclui na Aruba, dia 5 di Maart. E dia despues e Senadornan lo bolbe Hulanda.

E miembronan cu ta den e delegacion bao liderazgo di Sr. Rosenmöller, Groenlinks, ta Toine Beukering di Fraccion Nanninga kende ta alabes vicepresidente di e delegacion; Annemarie Jorritsma-Lebbink di VVD; Ria Oomen-Ruijten di CDA, Boris Dittrich di D66, Jeroen Recourt di PvdA; Arga Gerkens di SP; Peter Ester di ChristenUnie; Peter Nicolaï di PvdA; Martine Baay-Timmerman di 50Plus; Peter Schalk di SGP; Jeroen de Vries di Fractie Otten; y Ton Raven di OSF.

Griffier di e Comision Fred Bergman y Colaborador di Staff Maarten van Rooij ta guia e delegacion na nivel oficial.

Boris Dittrich

Mester bisa cu e bishita di Boris Dittrich na Aruba ta hopi interesante mirando cu e ta bolbe Aruba, despues di tabata forma parti di e delegacion di Tweede Kamer pa reunion interparlamentario di Reino durante e discusionnan riba e obligacion di Aruba pa inscribi matrimonio entre personanan di e mesun sexo. E tempo ey, e Parlamentario cu alabes tabata lider di D66 a haya palabra fuerte y hasta confrontacion cu difunto Rudy Croes, e tempo ey Minister di Husticia kende tabata hopi contra reconoce matrimonio di personanan di mesun sexo. Dittrich ta reconoci como un di e Parlamentarionan Hulandes cu mas a percura pa legislacion na interes di entre otro victimanan di crimen, unda danki na su proposicion di ley a haya e derecho pa hiba palabra durante Corte. Pero tambe victimanan di stalking a haya sosten legal di Dittrich, kende ademas a bin cu e ley cu a aboli e limite di tempo (verjaring) pa crimennan di asesinato y culpabilidad na morto. Pero durante su carera durante e periodo den Tweede Kamer y despues, Dittrich a traha duro pa reconocimento di derechonan di e comunidad LGBTQ, a introduci igualdad di matrimonio. Danki na su trabao, Hulanda a bira e prome pais na mundo pa legalisa matrimonio entre pareha di mesun sexo. Awe, un total di 27 pais a adopta e ley, incluso Colombia, Mexico y Brazil.

Na 2019, a eligi Boris Dittrich como Senador pa D66 pa un termino di cuater aña.