Durante conferencia di prensa ayera mainta, lider di fraccion di partido MEP den Parlamento di Aruba, Shailiny Tromp-Lee, a informa cu diadomingo binidero un delegacion di Parlamento lo ta biahando pa atende e reunionnan IPKO cu lo tuma luga na Corsou.
Tromp-Lee a indica cu manera ta custumber e reunionnan aki ta cuminsa cu un reunion tripartiet na unda e miembronan di Parlamento di Aruba, Corsou y Sint Maarten ta sinta hunto na mesa pa asina dialoga ariba topiconan cu e paisnan tin en comun. Pa e reunionnan aki, el a remarca, e topico mas importante cu tin riba agenda ta e parti di ‘geschillenregeling’ (solucion di controversia) un biaha mas.
“Mi ta kere e ta un terminologia bon conoci caba. Lastimamente durante aña hopi biaha nan a traha riba e aspecto aki caminda cu ora tin un disputa huridico entre e isla y Hulanda, hopi biaha na e isla no tin un proceso pa encamina,” el a splica.
Cu e geschillenregeling riba mesa atrobe, Tromp-Lee ta señala, nan ta indica cu e disputa huridico aki ta bay keda poni den man di un organo independiente di tur gobierno den reino y cu tur e consehonan, tur e pronunciacionnan di e organo aki, mester ta obligatorio.
Pero el a enfatisa cu ta na e punto aki semper tabata caminda cu e dialogo ta tranca. “Ban spera berdad cu tin e deseo politico, ban spera cu awo den e acuerdo di gobernacion di Hulanda ta para cu nan kier bay minimalisa e deficit democratico existente, cu nos lo logra cu e concepto cu awo ta bay keda presenta lo por keda carga y aproba,” Tromp-Lee a agrega.
Den luna di januari Prome Minister, Evelyn Wever-Croes, a biaha pa Sint Maarten pa asina dialoga ariba e tema di deficit democratico tambe. Wever-Croes a indica na Bon Dia Aruba, prome cu su biahe, cu pa Aruba en berdad ta hopi importante pa ta na altura cu tal bes nan no por elimina e deficit democratico riba termino corto, pero ta importante pa cuminsa en todo caso cu un ley di resolucion di disputa cu ta decente, den cual como Aruba nan ta sinti cu si en caso tin un disputa cu Hulanda, tin un areglo cu ta duna nan e derecho y ta salvaguardia e derecho di Aruba pa por bringa esaki tambe.
