Alexandra Valkenburg, como Embahador di Hulanda pa Cuba y Jamaica, probechando e presencia di Secretario di Estado di Hulanda Snel, Minister di Husticia di Sint Maarten, De Weever y Ministernan di Finanzas di Aruba y Corsou, Ruiz-Maduro y Gijsbertha, na Cuba pa oficialisa e Organisacion Aduanero di Caribe, a organisa un cena pa asina e delegacion completo por a ser conoci cu otro y comparti un rato ameno.
Ta importante pa Embahadanan di Hulanda cera conoci cu e trabounan cu cada Gobierno di e Paisnan den Reino ta ehecutando, pa asina di nan parti e Embahadanan por yuda si ta necesario cu informacion riba e plataforma internacional pa facilita e trabounan aki.
Prome cu e cena, Valkenburg a duna un discurso, den cual a splica e trabounan di e Embahada Hulandes na Cuba, y tambe a brinda informacion riba e situacion social y economico na e pais.
Ruiz-Maduro a gradici Valkenburg pa e hospitalidad, y tambe a gradici su persona y demas staf di Embahada Hulandes pa e preparacion y logistica necesario pa e reunionnan cu e delegacion di Aruba mester a hiba na Cuba.
