ORANJESTAD – For di municipio di Manaure, parti nort di departamento di Guajira na Colombia, a bin un delegacion pa sondea posibilidad di actividad comercial y economico bilateral, pero tambe pa busca conocemento cu Aruba tin pa medio di WEB riba tereno di produccion di awa potabel.
Carlos Sotillo a lidera e delegacion di cuater funcionario di e municipio menciona, y tambe ta gerente di e compania di awa di Manaure. El a declara na Bon Dia Aruba cu e meta di nan bishita ta pa crea mecanismo di cooperacion, entre otro, cu e compania estatal WEB NV. Ta conoci e experiencia cu Aruba tin riba tereno di produccion di awa di bebe via procesamento di awa di lama. Nan ta buscando mecanismo di cooperacion cu por facilita e intercambio di conocemento tecnico y economico pa nan planta di awa por bira uno sostenibel.
Intercambio di conocemento
Nan prome proyecto piloto tin di haber cu e procesamento di awa di lama, y actualmente nan ta conta cu fondo pa realisa e proyecto aki, pero nan tabatin mester di conocemento. Pa tal motibo nan a bin realisa e bishita na e planta nacional di WEB, pa haya un bista riba nan parti administrativo y operativo. Pero tambe –segun Sotillo– nan a mustra nan proyecto na e expertonan di WEB, pa asina crea un mecanismo di viabilidad tecnico. Igualmente, nan lo cuminsa busca e manera pa nan personal por haya capacitacion for di nos expertonan na WEB.
Nan a bay masha satisfecho, ya cu nan por a bay cu un idea mas cla cu te awor loke nan ta bin haciendo ta riba bon caminda. Logicamente pa formalisa un tipo di cooperacion asina mester di e sosten di e gobierno di Aruba, pa medio di un documento cu ta permiti e facilidad di intercambio di conocemento y asesoria tecnico. Nan ta evaluando e posibilidad pa trece nan personal pa adkiri capacitacion y training na Aruba.
El a bisa cu Manaure ta un region cu tin casi e mesun caracteristico di clima y naturalesa cu Aruba, y tambe nan tin acceso na lama. “Nos sa di Aruba su experiencia riba produccion di awa pa consumo humano,” el a bisa. Tin mas pais cu ta produci awa via lama; pero mirando e cercania geografico entre Manaure y Aruba, y tambe e manera eficiente cu nos isla a opera su planta di produccion di awa, ta haci cu nan a bin cerca nos pa busca laso di cooperacion.
Segun Sotillo, nan pueblo y region ta padece di sed, ya cu nan no tin fuente superficial di awa manera riu of lago cu ta permiti nan pa traha cu acueducto of planta convencional. Nan ta haci uzo di pos profundo, pero nan mester procesa e awa brak aki pa nan consumo humano. A pesar cu nan tin cierto tecnologia, nan no tin e capacidad pa abastece di e likido vital aki na mas cu 112 mil habitante cu nan tin actualmente.
Actividad comercial
Tambe nan a sondea otro tereno cu tin di haber cu intercambio comercial. Aunke tin documento y esfuerso haci, ainda e actividad comercial aki no a haya forsa. Nan a sostene contacto cu diferente comerciante, pero tambe cu departamento di asunto economico, pa evalua cualkier posibilidad di intercambio comercial. Nan a papia di posibilidad di aliansa strategico riba sector primario, manera pesca y agricultura.
Un factor faborabel tin di haber cu Guajira tin un regimen fiscal di duana masha special. Nan ta manera di un ‘free zone’ of zona franca special den e municipionan di Manaure, Uribia y Maicao. E ta haya cu esaki lo por bira un fuente di abastecemento di productonan di calidad y bon prijs faborabel pa Aruba su pueblo, mirando e situacion dificil pa Aruba abastece su mes di productonan for di Venezuela.
“Esaki ta nos posibilidad di apoyo pa Aruba. No solamente nos kier ricibi conocemento di Aruba, sino cu nos lo por apoya Aruba su economia pa medio di nos productonan,” segun Sotillo. El a bisa cu via e municipionan aki, Aruba por abastece su mes cu productonan basico y esencial pa su habitantenan.
E delegacion aki a conta cu presencia di Leonardo Oviedo, kende ta asesor di proyectonan municipal. Tambe den e delegacion importante aki a bin e secretario di planeacion municipal, Jhon Gomez, y tambe sra. Yanitza Lastra, kende ta e gestor social di Manaure. El a bin representa directamente e Alcalde Aldemar Ibarra, kende ta e principal autoridad administrativo di e municipio aki, cu ta wordo caracterisa pa su mina di salo.
