Fin di augustus lo inicia na e Indianapolis, Merca e campeonato mundial di landamento den e categoria junior caminda Aruba lo tin tres participante. E atletanan Patrick Groters, Keeley Maduro y Flory Kock ta esnan cu lo representa Aruba den e campeonato mundial aki. Pa dos di e atletanan esta Keeley Maduro y Flory Kock esaki lo fungi como un preparacion extra pa e Weganan Sur Americano Hubenil 2017 cu lo tuma luga fin di luna di september awor na Santiago de Chile. Mester bisa cu e atletanan aki tur ta den pleno preparacion, algun di nan a atende clinica di landamento combina cu competencia durante di e vacacion escolar.
Durante di e campeonato mundial na Indianapolis, e tres atletanan lo landa den diferente disciplina. E atleta Patrick Groters lo landa den e cinco disciplina cual ta e 50/100/200 meter lomba y e 200/400 meter IM. Pa loke ta e landadonan femenino, e atleta Keeley Maduro lo landa tres disciplina cual ta e 50/100 meter mariposa y e 400m free mientras e atleta Flory Kock tambe lo landa tres disciplina cual ta e 200/400/800 meter free. Pa e tres atletanan di landamento esaki lo bira un experiencia super grandi mirando cu nan lo topa e miho top atletanan junior di mundo den e deporte acuatico. No obstante di e nivel di competencia e tres atletanan aki sigur lo duna un bon bataya ya cu nan logronan pa Aruba ta grandi den exterior. Numereso medaya a wordo gana den e diferente competencianan renombra den nos region y continente, mientras e atleta Groters ta haci un bon papel hunto cu su scol na Merca.
