Recientemente prome minister a tuma e decision cu lo manda un delegacion di profesionalnan di Aruba pa Estado Falcon, Venezuela pa purba yega na palabracionnan den aspecto di siguridad y documentonan cu mester exigi na momento di importacion. Si logra esaki, lo por logra habri tambe e frontera y por permiti como excepcion importacion di fruta, berdura y pisca.
Segun un comunicado di gobierno, prome minister Evelyn Wever-Croes (MEP) den siman, hunto cu coleganan minister Xiomara Ruiz-Maduro (MEP) y minister Andin Bikker (POR), a reuni varios biaha cu e conseheronan y autoridad maritimo na Aruba riba e tema di e Waf na Barcadera pa carga procedente di Venezuela. E mandatario ta bisa cu e nivel di siguridad pa transporte di carga y persona tin prioridad den e discusionnan.
Prome minister ta indica cu e meta di e reunionnan ta pa explora si por logra habri e Waf prome cu dia 6 di juni pa importa productonan cu ta fruta, berdura y pisca. Pa motibonan di siguridad, esaki no ta deseabel. Y ademas, segun e mandatario, di parti di Venezuela no ta ricibiendo ni un cooperacion cu por yega na apertura di e Waf mas lihe. Esaki lo no nifica cu a yega na normalidad di haci negoshi pero por lo menos lo por yuda cu nos por importa e productonan aki na un prijs mas rasonabel.
Prome minister a duna di conoce cu e negociacionnan cu Venezuela ta bayendo hopi dificil. Pa Aruba e aspecto di siguridad na Waf ta hopi importante. Y Aruba lo habri e Waf un biaha mas solamente ora Aruba ta sinti confortabel cu e nivel di siguridad pa transporte di carga y di hende. Mientrastanto riba peticion di hopi ciudadano ta haciendo tur lo posibel pa por yega na habri e frontera pa importa fruta, berdura y pisca.
“Den curso di otro siman ta spera cu e delegacion aki lo biaha pa Venezuela y lo trece noticia positivo pa nos.”
