Mision di e delegacion di Aruba na Hulanda, bao guia di lider di AVP, mr. Mike Eman cu consehero di fraccion Wendrick Cicilia den un esfuerso conhunto di Fundacion Digna Lacle-Herrera y Fraccion di AVP a organisa un intercambio di pensamento pa studiante y profesionalnan hoben Arubiano na Hulanda. Dor di e storm na Den Haag un anochi di dialogo a bira dos. Ta di e manera aki Mike Eman kier a garantisa cu fuera di a sinta dialoga cu lider politico y experto, e lider di partido tambe ta haya hopi importante pa scucha for e generacion cu lo mester carga nos pais mañan kico nan pensamentonan y deseonan ta.

Un encuentro a tuma lugar, a pesar di tempestad den het Nutshuis na Den Haag y otro encuentro a tuma luga na e Ondernemershuis na Den Haag caminda un grupo bon representa di tanto studiante, como profesional, a atende tur dos encuentro pa topa cu Eman y Cicilia pa expresa nan opinion riba loke ta sosodiendo na Aruba y cua ta e rumbo pa tuma. Tur ta di acuerdo cu aworaki situacion ta dificil y cu tin mester di un cambio di vision si un dia e tereno por ta fertil pa nan regresa.

Stacey Petrochi di 24 aña y studiante di filosofia na universidad di Leiden ta a expresa di ta comparti e vision di Eman, specialmente su plan pa brinda asistencia pa cu e pago di Arubalening, pero tambe ta kere cu lo por inclui DUO pa haci’e mas atractivo. E ultimo aki ta hunto cu salario abou ta loke ta pisa ora ta contempla un regreso pa Aruba.

Di su banda, Andre Garcia a keda impresiona e inspira pa e presentacion di Mike Eman. Tambe e ta duna hopi elogio pa e posibilidad cu ta duna studiante y profesional hoben e oportunidad pa aporta cu nan ideanan. A papia di con por desaroya e isla di e miho forma, crea oportunidad nobo, no solamente economico, pero tambe den tecnologia.

Garcia, di 30 aña ta biba na Amersfoort y ta traha na Amsterdam. “Tin futuro na Aruba, djis mester traha duro riba dje,” el a bisa. Un di e cambionan di mas grandi cu, segun e, mester bin ta den e tereno di enseñansa.

Despues di a gradua den e facultad di OGM na Universidad di Aruba, David Quant di 25 aña a bay Hulanda pa haci un master. E ta kere cu aunke actualmente cos ta hopi preta, tin oportunidad na Aruba pa explora den campo di entrepreneurship. “Duna nos hobennan un chens pa introduci otro pensamento y otro innovacion den nos economia,” el a expresa. Pa loke ta e Social Cultureel Plan Burea, Quant ta mira e fruta cu por bin di esey, mescos cu un fondo cu ta yuda hoben inverti den idea nobo.

“No tin un solucion specifico. Mi ta pensa cu e ta cuminsa na un cambio di pensamento; un aceptacion pa nos talento cu ta afo, aceptacion pa pensamento nobo, idea nobo, manera nobo di haci negoshi, di introduci educacion y for di e punto di bista ey, stap concreto lo bin tambe.”

Axcell Petrochi tambe ta kere den un cambio di pensamento cu enfoke riba innovacion. E tin 23 aña y ta studia ley internacional y Europeo na De Haagse Hogeschool. Aruba mester innova pa atrae studiante cu a bay Hulanda. “Ami lo kier bay bek. Awo ta dificil, pero nos tur tin cu lucha p’e,” asina e studiante a indica. E ta hopi inspira pa e presentacion di Eman y Cicilia. Esey ta e vision cu nan ta warda riba dje pa por regresa Aruba.

Eman y Cicilia a gradici tur esunnan cu a haci e anochi aki na Den Haag posibel. Na clausura di e evento nan a expresa nan entusiasmo pa lora manga y traha riba un futuro den cual absolutamente tur hende por disfruta di e trabou cu e generacionnan prome cu nos y actual a traha p’e, pero tambe di e potencial di e generacionnan na caminda.