ORANJESTAD – Durante e vacacion escolar, a tuma luga e di 48 edicion di e CARIFTA Games den e deporte di atletismo. E federacion di atletismo di Cayman Island a haya e oportunidad di organisa e Carifta Games unda a celebra e di 48 edicion di e weganan aki. Mas cu claro Aruba a participa un bes mas cu un delegacion bon prepara bou guia di nos entrenador y coachnan miembro di e federacion di atletismo Arubano, AAF.
E delegacion di Aruba a consisti di 6 atleta cu a duna bon bataya den e diferente disciplinanan di e deporte madre di Olimpismo esta sprint, long distance, jump, high jump y shotput. E atletanan cu a representa Aruba tabata J-Rick Maduro U18 cu a competi den e 1500m y 3000m, Luis Erasmus U18 cu a competi den e 100m y Salto largo. E hoben Tariq Polonius a core e 100m y 200m sprint mientras Kirah Regales U20 a competi den e 800m y 1500m. Por ultimo Aureen Lampe a midi forsa den e disciplinanan di Kogel, Discus y Speer mientras Shawney Coenraad a competi den Kogel y Discuss.
E competencia di Carifta a bira e prome competencia oficial pa nos atletanan di atletismo. Aruba a bataya fuerte contra e mihonan den Caribe manera atletanan di Jamaica, Grenada, Barbados, Bahamas y Cayman Island cu ta domina e deporte madre di Olimpismo mundialmente. E resultadonan tabata satisfactorio, aunke nos no a logra cay den premiacion.
Stichting Sportsubsidie Aruba ta contento di por aporta y brinda e ayudo na e federacion di atletismo, AAF cu a participa den e 2019 Carifta Track and Field Games 2019 na Cayman Island.
