E siman aki diferente miembro di ekipo di A.T.A. di Aruba y Latino America, como tambe AAA y socionan den industria turistico ta presente na Bogota, pa asisti na e di 42 edicion di “Vitrina Turistica y Rueda de Negocios” di ANATO.

E vitrina Turistica di ANATO ta un di e eventonan di mas grandinan den region, unda ta duna oportunidad pa socionan existente den e industria topa y fortalece relacionnan y a la vez ta habri porta pa socionan nobo posiciona nan mes.

Manera ta custumber, e apertura oficial di e evento a conta cu presencia di presidente di Colombia, den e caso aki Presidente Gustavo Petro ken a hiba palabra na tur presente. Tawata tin algun miembro di e ekipo di Aruba presente na e apertura oficial; Ronella Croes, Sanju Luidens y Jordan Schlipken di A.T.A. como tambe Jo-Anne Meaux-Arends di AAA.

E aña aki e booth di Aruba a conta cu presencia di Ernst Norman, Embahador di Hulanda na Bogota como tambe Jan Willem van Bokhoven, Director di Holland House. Hunto cu e ekipo di A.T.A. nan a corta e cinta pa asina habri e booth oficialmente.

E booth di Aruba a conta cu presencia di 13 diferente hotel, tour operator y compania di Aruba cu a atende e evento. Esaki sigur ta un bon indicacion di e interes cu tin pa e mercado aki, maske e tawata un di e ultimonan pa habri bek despues di e pandemia y como resultado su recuperacion a tarda mas cu otro mercadonan.

2023 ta mustra di lo ta un aña mas fuerte pa e mercado aki den su totalidad ya cu e situacion den diferente di e paisnan ta mas normalisa, y oportunidadnan pa biaha ta yegando bek na nivelnan di prome cu e pandemia. A.T.A. tin como meta pa yega un recuperacion di 103% for di e mercado di Latino America na final di 2023 compara cu 2019, pues un crecemento di 3%.

Na januari 2023 98,942 bishitante stayover a yega Aruba. Entre nan 8,350 bishitante, cu ta 8.4% a bin for di Latino America. E 3 mercadonan di Latino America cu a trece mas bishitante Aruba den januari 2023 tawata Colombia, Argentina y Brazil. E 2 aerolineanan mas grandi for di Latino America ta Avianca y Copa Airlines cu hunto tawata tin 6.6% di e cantidad total di bishitante den januari 2023.

A.T.A., AAA, AHATA y socionan den industria lo sigui traha hunto pa yega na e recuperacion y crecemento den cada un di e mercadonan aki.