Diahuebs merdia, e delegacion Arubano cu ta participa na e Weganan Sur Americano Hubenil Santiago 2017 a keda oficialmente yama bon bini na Santiago de Chile.
E delegacion di atletanan ta consisti di Keeley Maduro, Anahi Schreuders, Sophia Petrocchi, Chiara Petrocchi, Giannon Eights, Ching Ho Chung, Jeandry Mathilda, Frederick Sydow, Patrick Sydow, Brandon Cheong y Daniel Jacobs.
Den e Parke Olimpico di Chile cerca di e Estadio Nacional Julio Martinez a tene e tradicional ceremonia di bandera unda tur e paisnan participante na e 2do Juegos de la Juventud Santiago 2017. Na e weganan aki e 14 paisnan di e continente Sur America lo bataya den e 20 deportenan unda mas cu 1500 atleta den e edad di 14 – 17 aña lo competi. E ciudad anfitrion Santiago y su hendenan a yama bon bini na henter nos delegacion di atleta, coach y dirigentenan, segun e relato di Comite Olimpico Aruba.
“Mester bisa cu pa Aruba, e staf di coachnan hunto cu e staf medico y tecnico a presenta na e ceremonia di bandera mirando cu e atletanan lo yega diahuebs den oranan di anochi laat na e ciudad di Santiago for di Panama. Presente hunto e delegacion nos por a mira presidente di COA, Roy Mezas y miembro di directiva di COA, Menno Vinck.” Despues di a hisa nos bandera acompaña pa nos himno, hefe di mision Kamilah Dammers-Naddall a intercambia regalo cu Michael Black kende ta e director ehecutivo di e Weganan Sur Americano Hubenil Santiago.
