E rol di Boneiro t e deseonan cu tin como destinacion Cruzero ta bini dilanti e siman aki durante un conferencia na Miami. Pa esaki un delegacion di Boneiro cu ta consisti di diputado di desaroyo economico Hennyson Thielman, capitan di haf Gunther Flanegin y Tourism Corporation Bonaire (TCB) a biaha pa Miami, Florida.
Durante e cumbre “Return to Sail” di e organisacion Florida-Caribbean Cruise Association (FCCA) diferente companianan crucero y destinacion den e sector crucero ta bini hunto. Nan ta papia tocante desaroyo di e industria y reanudacion di biahenan crucero.
Boneiro ta participa na e conferencia aki cu e intencion pa comunica e vision cu nos isla tin pa futuro bishita di barconan crucero. Awor cu nos ta para na un punto pa cuminsa di nobo, ta un bon oportunidad pa introduci cambionan. E posibilidatnan ta amplio pa por restructura y implementa un maneho miho balansa. Cu e plan di recuperacion di turismo, Entidad Publico Boneiro ya caba a comunica e decision pa acepta no mas cu un barco crucero pa dia na nos isla y enfoca riba turismo di mas calidad. Cu un limite di maximal 1 barco pa dia, e meta ta pa reduci congestion den centro di Ciudad y brinda espacio pa nos atrae turista cu un budget mas grandi cu ta gasta mas na nos isla.
Un otro cambio cu e delegacion kier combersa di dje ta subida di impuesto di bishitante, cu lo conta tambe pa turistanan crucero yegando Boneiro (reemplasando e asina yama “head tax”). E subida den e impuesto aki lo percura pa mas cen den caha di gobierno pa por inverti bek den facilidad y infrastructura pa comunidad y e sector di turismo.
E delegacion di Boneiro ta bay combersa tocante rekisitonan cu nos como isla lo rekeri den e añanan binidero di e barco cruceronan. Considerando e direccion cu nos a tuma pa ta un isla “Blue Destination” y e maneho di nos plan di recuperacion di turismo, lo bay rekeri barconan pa cumpli cu exigencianan sostenibel cu ta cuadra den e vision pa cuida nos medio ambiente.
Un otro tema interesante ta e posibilidad pa liñanan di barco crucero inverti den atraccion y naturalesa na nos isla. Facilidadnan cu keda crea of mehora cu e inversionnan aki no ta solamente pa turista pero tambe pa nos hendenan local disfruta di dje. Esaki ta un strategia pa nos capitalista y saca mas beneficio for di e barconan crucero. “E industria crucero ta genera divisa, hopi hende ta dependiente di e industria y e sector aki ta crea alrededor di 200 cupo di trabou directo y 600 indirecto. Na mes momento nos ta kere cu e mester ta mas riba mesun liña cu nos metanan pa cu medio ambiente, mas mihó organisá, mester tin mihó “crowd management” i mihó utilisashon di e mercado pa crucero (“cruise market”). Cu cooperacion di TCB nos kier coordina e aspectonan aki y haci algo diferente”, segun Hennyson Thielman, diputado di desaroyo economico.
E biahe pa topa cu e diferente companianan di crucero ta parti di e preparacion pa por ricibi barco crucero bek na nos isla posiblemente den luna di september. Lo comunica claramente cu e fecha aki ta tentativo y ta depende di decisionnan den cuadro di maneho di Covid, entre otro condicionnan pa loke ta trata testmento.
