Deficit presupuesto 2017 ta ficticio?

Oposicion ta purba laba man

E observacion cu a gana premio den e debate ayera den parlamento, den tratamento di e presupuesto complementario 2017, tabata di e parlamentario y ex-ministro di asunto economico, cu su comentario cu un deficit menasante no ta problema, nos tin trinta aña ta tende esaki caba y nos tin trinta aña ta atende e asunto ey caba… Cu otro palabra: deficit no ta problema, ta cada ken mester sa deal cune… Cu e sugerencia naturalmente cu e incapacidad di e actual gabinete lo ta e problema. Ta na e gabinete ey mes pa contesta riba e tipo di ‘cheap shot’ aki, pero ta keda e otro aspecto cu e no a menciona. E no a bisa, cu nos tin trinta aña en berdad di deal cu e problema ey… fiando placa, aña tras aña.

No solamente esaki tabata e plaga constante den tur e añanan aki, pero loke a corona obra tabata e desperdicio na grandi, realmente sin precedente, cu a tuma luga den e ultimo ocho añanan. Nos a bay di un debe di alrededor di Afl. 2200 miyon na fin di 2009, te casi Afl. 4200 miyon awor, sin conta aden loke mester fia extra pa por cera aña. Y e personalmente tabata un di actornan principal den e desastre financiero, cu varios aña cu deficit di riba Afl. 400 miyon, cu nan a ‘resolve’ bunita asina, fiando placa… Y nos no ta papiando ainda di e debenan extra di e proyectonan PPP, cu ta añadi un gasto extra di casi Afl. 90 miyon pa aña, pa e proximo decadanan. Esaki ta yuda obstaculisa yega na un presupuesto balansa, y na atende cu e presupuesto limita cu ta keda, e sin fin di necesidad cu e comunidad tin.

Pero enfin, finalmente loke e ta trece dilanti a bira irelevante, y no pasobra e ta forma parti di oposicion y por lo tanto ta perde e bataya, pasobra e banda di gobierno tin e votonan pa pasa e ley di presupuesto complementario. El a bira irelevante, pasobra si nos scucha bon kico e ta trece dilanti, e ta bisando cu ni e conseho di CAft, ni esun di Raad van Advies ta valido. Si nos sigui su forma di argumento, nan ta mes incapaz cu e gabinete actual. Lo tin hende cu lo ta kere loke e ta trece dilanti, pero nos ta spera cu nan no ta tanto. Ademas, no ta un poco straño, si bo sigui su manera di argumenta, cu gobierno lo ta bay fia placa innecesariamente? Segun e parlamentario aki, e ta kere cu e placa di Refineria di Aruba NV ta bay drenta caha di gobierno ainda. E lo ta un di e poco hendenan na Aruba cu ta kere esey ainda.

Si nos ta sigui e noticianan di ultimo tempo, tin varios aspecto cu ta haci practicamente imposibel cu e proyecto di rehabilitacion di e refineria lo haya continuacion a corto plaso, si acaso logra implementa e plan den un futuro mas leu. No ta solamente e situacion financiero di e empresa madre na Venezuela ta di collapse gradual, unda tin dificultad pa cumpli cu debe na tenedo di bono y na proveedor di bienes y servicio, pero ta e implosion cu ta tumando actualmente den produccion di petroleo na e pais mes, cu ta sufri gravemente di e falta di inversion den exploracion nobo y den mantenemento di nan instalacionnan. E ultimo aki por ilustra cu e ultimo noticia di Bonaire, unda e autoridadnan Hulandes ta na punto di cera e terminal di almacenamento di crudo cu PDVSA ta opera aya. Un gran parti di e facilidadnan no ta den uso mes mas, a bin resulta awor. Igualmente ta pasando na tur nivel den e empresa aki y su subsidiario nan den e pais y den exterior. En corto: si sucede un milagro mañan na Venezuela, cu ta bay tin un gobernacion stabiel cu por hiba e pais dilanti, anto ainda ta dura por lo menos 10 aña pa recupera loke e criminalnan socialista a haci cu loke un tempo tabata un di e empresanan petrolero mas prestigioso na mundo. Anto ta kico nos ta spera di e banda ey ainda?

Naturalmente cu esaki ya no ta e problema di e apreciabel parlamentario, pasobra ta responsabilidad di e gobierno actual pa determina kico lo mester bay sucede di awor en adelante. Y den esaki nos no ta interesa solamente na sa cuanto e deficit e aña aki lo ta; nos sa cu lo mester financia esey externamente. Mas interesante ta kico ta bay haci den aña 2018 y e siguiente nan. Pasobra ta logico cu e caida te na potencialmente 4% di GDP di deficit den e presupuesto 2018 no ta algo cu ta bay resolve den un aña so. Y como agravante e mesun desastre cu ta rondona e refineria, ta haci cu nos no mester bay conta cu nada di contribucion na nos economia di e banda ey, a menos cu bin cu plannan pa cambia e rumbo actual. Den e ultimo lunanan a bira obvio cu nos lo mester cuminsa biba sin e soño, o pesadiya, cu e ilustre parlamentario a yuda crea na San Nicolas.