Defensa ta pone mas medio y personanan disponibel pa sostene Wardacosta den Region Caribe cu vigilancia di fronteranan maritimo. E esfuerso extra, ademas di na Corsou a keda expande tambe na Aruba. E Militarnan ya pa bastante tempo ta haci extra observacionnan den Region Caribe pa por detecta na tempo, posibel yegadanan na Costa di personanan indocumenta.
Despues di un peticion pa sosten di Aruba, Defensa a dicidi di sostene Wardacosta cu observacionnan di Costa. Anteriormente den e aña aki Defensa tabata haci esaki caba. E sosten cu ya tabata canando na Corsou a keda larga pa Gobierno di Corsou. Ademas di evita cu esunnan indocumenta ta haci e traspaso pa e islanan ABC, hopi biaha cu botonan cu no por soporta lama gancho, e esfuerso aki ta funciona tambe preventivamente contra di contrabanda di droga y arma. Tanto militarnan di Caribe, consistiendo di ARUMIL y CURMIL, como militarnan procedente di e ‘32 Raiding Squadron (Batayon na Aruba)’ y e ‘Compagnie in de West (Batayon na Corsou)’ ta keda desplega pa e tarea aki.
E esfuerso ta duna su frutanan. Asina ayera nochi, tambe pa medio di esfuerso di Defensa, a detecta un yegada na tera di personanan indocumenta na Aruba. Aki a detene seis persona. E sosten na e autoridadnan civil ta un di e tres tareanan primordial di defensa den Region Caribe. Esaki ta sosode na diferente forma, di yudansa den calamidad durante horcan, te na sosten di Polis of Wardacosta.
