Departamento di Defensa Mericano a bisa cu e Secretario di Defensa nobo Mark Esper ta revisando e proceso di destaho publico cu Amazon a cana pa asina yega na e ehercito su contract di 10 biyon dollar pa ‘cloud-computing’.
Presidente Donald Trump a critica e proceso, citando otro companianan cu a indica cu Gobierno Mericano ta faborece e compania gigante Amazon. E gigante di comercio online y Microsoft tabata competiendo pa asina yega na e contract, cual ta carga e nomber di Joint Enterprise Infrastructure Plan, of JEDI.
Elissa Smith, actuando como Vocero di Defensa, a bisa cu nan no lo tuma ningun decision relaciona cu e contract te cu nan caba di revisa e contract y e proceso cu Amazon a cana pa yega te ey. The Washington Post a raporta diahuebs ultimo, citando fuentenan anonimo, cu Cas Blanco a ordena pa defensa revisa e proceso y e contract. Fundado di Amazon y CEO di e compania Jeff Bezos ta doño di Washington Post. Amazon no a reacciona inmediatamente pa comenta.
Oracle y IBM a keda elimina den un ronda anterior di e competencia pa yega na e contract, lagando Amazon y Microsoft como e finalistanan. Un luna pasa, prome cu Trump a comenta riba e intencion pa laga su gabinete revisa e situacion di cerca, un Hues Federal a considera no admisibel Oracle su demanda unda ta tilda e proceso pa e destaho di ta faboreciendo Amazon.
Na mes momento, tin miembronan di Congreso cu tambe ta cuestionando si lo tin algun conflicto di interes envolvi cu e contract. Anteriormente, defensa a anuncia cu nan lo honra e contract riba 23 di augustus. No ta conoci si e revision lo bay tarda e proceso.
