Defensa Hulandes mester prepara pa menasanan nobo den henter Reino; Scenarionan scur riba papel ta pa ilustra necesidad pa cambio

Tendencianan tecnologico, movecion di poder geopolitico, preocupacionnan economico y demografico, ademas di ecologia bou presion ta percura pa risico y menasanan nobo. Esaki ta locual Minister di Defensa di Hulanda Ank Bijleveld Schouten a presenta den e Vision di Defensa “Fighting for a Secure Future.’ Den e rapport a mishi tur area cu Defensa mester traha pa yega na mehoracion incluso den e area Caribense di Reino. Esaki cu bista pa 2033.

Scenarionan scur

E demarcacionnan di un realidad nobo ta birando mas cla pero insiguridad kico e ta, ta keda un caracteristica di nos tempo. Rusia ta mas agresivo, China mas acertivo y menasanan terorista ta keda existi. Asocacionnan manera e Organisacion di Tratado di Norte Atlantico, NATO, Union Europeo y Nacionnan Uni no ta garantianan mas.

Reino Hulandes y mundo ta keda confronta cu atakenan cibernetico, menasanan contra infrastructural vital y influencianan di podernan stranhero. Cambio di clima ta haci cu naturalesa ta bira dificil pa pronostica. Tensionnan geopolitico y e ploriferacion di arma ta percura pa situacionnan cu facil por explota.

A traha diferente scenario unda Defensa di Reino lo mester actua, basa riba rapportnan cientifico y combersacionnan cu expertonan, pa asina yega na un analisis di tendencianan.

E conclusionnan ta cu mester ta prepara pa casonan cu en todo caso tin di haber cu e puntonan menciona.

Atakenan cibernetico y influencia

Reino Hulandes ta haya su mes constantemente confronta cu atakenan riba e tereno di internet y informacion. Ta horta conocemento, ta hack sistemanan vital y desinformacion ta influencia democracia. Ta uza influencia economico pa pone presion. E discusion riba 5G y produccion di microchips ta mustra con tenso e area ta. E ta hopi mas facil pa bay directo na e ciudadano of gruponan pa motibo di medianan social y tacticanan di influencia. Paisnan manera China, Rusia y Iran tin un palet amplio na instrumentonan militar y no-militar cu nan por uza of riba nan mes, of na mesun momento pa haya mas poder y influencia.

Menasa natural dificil pa pronostica

E menasanan no ta factornan estatal y di gruponan unicamente. Tin mas y mas fenomeno natural cu ta peligroso pa humanidad. Nivel di lama ta sigui subi, patronchi di tempo y sistemanan ecologico ta cambia. Horcan y tempo extremo tin efectonan desastroso pa e parti Caribense di Reino, manera a mira cu horcan Irma. Pero Hulanda tambe ta vulnerabel, tanto cu inundacion y candelanan (bosbranden). Y den henter e region rond di Europa por confronta conflicto, instabilidad politico, radicalisacion y posibel fluhonan iregular di migracion como consecuencia di secura, yobida cu no por predici, awa bou tera cu ta bira dificil pa uza y scarsedad di fuentenan di awa.

Situacionnan geopolitico explosivo

Ta mira mas y mas ehercicio militar na gran escala na e fronteranan di e paisnan NATO y con ta kibra cu e soberania riba e areanan di tera, lama, espacio aereo pero tambe den e tereno cibernetico. Ta confrontando e consecuencianan di un guera comercial entre Merca y China, y tin un competencia pa tecnologianan innovativo y pa pone standard internacional. Ta hibando gueranan cu otro riba teritorionan di Syria, Lybia y Jemen, pero tambe Caribe a bira mas geopolitico. E tono di combersacion a bira mas duro, hasta ora ta papia di armanan nuclear. E stabilidad strategico cu a gosa di dje pa ultimo decadanan ta abou presion y e structura internacional di control di arma y desarmamento ta cayendo den otro. E desaroyonan rond di e acuerdo di Iran ta preocupante, mescos cu e actividadnan balistico di Noord Korea.

Menasa contra infrastructura vital

Hulanda ta un di e actornan mas importante den comercio global. Si mester tuma Schiphol por ehempel, riba un dia activo, prome cu Covid, e aeropuerto tabata duna servicio na como 200 mil pasahero. E puerto di Rotterdam ta esun mas grandi di Europa y ta un punto di conexion logistico importante pa mundo

Pero, riba nivel di data, Hulanda ta un hub importante pa kabelnan di internet cu ta den Noordzee y e Amsterdam Internet Exchange.

Tur e puntonan di coneccion aki, incluso telecomunicacion y provisionnan di energia, ta crucial pa economia fuerte di Hulanda y funcionamento diario. Como tal, nan ta keda blanco pa atakenan, pa esunnan cu kier afecta Hulanda.

Banda di esey, ehercitonan di rivalnan potencial ta birando mas fuerte, door cu nan ta expande y modernisa nan capacidad. Nan ta trahando duro pa no keda atras mas. E sistemanan di arma ta mira mas preciso, e uzo di sistemanan sin hende ta mas comun, y e tempo di reaccion ta minimo. Rivalnan lo scoge pa uza sistemanan di arma cu no tin mester di mucho control di hende, y den combinacion cu e tensionnan entre e podernan global, esaki ta nifica cu tin un situacion explosivo.

China por ehempel, a pesar di e crisis di corona, a bolbe aumenta su presupuesto di defensa te cu 178.2 mil miyon dollar. Beijing kier un ehercito completamente modernisa pa 2035. Russia ta desaroyando armanan hypersonar, robots, drones y laser y forma pa stroba Reino pa yega na cierto areanan. Pero no solamente contrinctantenan ta tumando pasonan extremo. Merca y Australia por ehempel ta invertiendo grandemente den nan organisacionnan di defensa, particularmente debi na e menasa creciente di China.

Tecnologia y armanan kimico/biologico

Gruponan y paisnan terorista tin mas facilidad pa yega na tecnologianan adapta, manera drones y otro arma. China y Rusia ta desaroya, produci y exporta mas y mas sistemanan moderno di arma. Rusia por ehempel a entrega sistemanan di armamento sofistica na Iran, Turkia y Syria. E democratisacion di tecnologia y sistemanan di arma ta aumenta e posibilidad di accident y atakenan cu no por premira. Tambe ta un peliger creciente cu un contrincante por desaroya y uza un medio di guera cu ainda ta desconoci riba e tereno biologico, kimico y nuclear. E reparticion di armanan nuclear chikito y tactico ta amplia e posibilidad pa escalacion.

Extremismo y terorismo

Ehercitonan nacional na Europa y otro pais rond mundo no ta capacita pa domina e organisacionnan jihadista. Ainda tin hopi region Africano cu ta sufri debi na hopi violencia motiva pa luchanan etnico y jihadista, particularmente den e regionnan Sahel y Hoorn di Africa. E gruponan Jihadista tin un nivel preocupante di libertad di movecion y capacidad. Nan ta move den e areanan unda tin e asina yama gueranan proxy (unda otro podernan ta bringa otro riba pafo di nan mesun fronteranan), manera Lybia, Syria y Jemen. Estado Islamita, ISIS, ainda ta activo y ta haci esaki bou radar. E desaroyo den e areanan di confrontacion Jihadista por inspira Jihadistanan na Hulanda pa comete atakenan.

Frustracion y pobresa na frontera di Europa

E populacion di Africa, awor caba na 1.1 mil miyon hende, lo ta dos biaha mas grandi na 2050. Ciudadnan lo bira mas druk y Gobiernonan rond mundo lo tin menos control riba locual ta sosode den barionan mas pober. Miyones di hobennan lo mester drenta mercado laboral, pero te ainda tin mucho poco trabou. Esaki lo keda traduci na mas presion riba fronteranan di Europa. Organisacionnan criminal, y gruponan Jihadista ta mira nan como fuente fresco pa mas luchado, mientras cu e desaroyo aki ta fomenta un pensamento nacionalista y extremo derechista. Y crimen organisa ta bira mas grandi y mas violento. Tambe den Reino Hulandes.

Caribe Hulandes

Banda di e menasa di desaster natural y crimen organisa, Defensa Hulandes a pone un scenario unda siguridad den Caribe Hulandes ta bou presion debi na e situacion di crisis na Venezuela, e rivalidad creciente entre China y Merca y agresion Ruso.

E descubrimentonan di posnan nobo di petroleo na e parti Noord di Sur America lo conduci na disputanan di frontera. Ya caba paisnan SurAmericano ta trahando pa fortifica y modernisa nan forsanan militar cu sosten di otro pais.

Den e paisnan concerni y tambe riba islanan ABC, tin e miedo cu e conflictonan na e fronteranan lo escala y yega na destabilisacion di e region. Corsou y Aruba lo ta confronta cu mas refugiado, cu ta bay produci escasez di cuminda, cu consecuencianan peligroso manera violencia y ladronicia. Organisacionnan criminal internacional lo haci uzo di cualkier situacion inestable pa transporta droga y arma, pa medio di e fluhonan di refugiado, cu ta contrabanda di hende y arma. Ademas, e scenario ta pinta e peliger cu barconan rond di e islanan lo bira blanco di atraconan violento.

Defensa ta pa Reino

E scenarionan scur aki ta pa ilustra vulnerabilidad di e desrupcion di siguridad interno riba e islanan ABC, un emergencia humanitario y crimen organisa violento. E intencion pa un scenario dramatico asina aki ta pa midi locual Defensa di Reino lo por haci contra un posibel escalacion militar den Reino. Particularmente mirando cu e parti Caribense di Reino ta keda pafo di e teritorio di NATO y pafo di Union Europeo.

Minister di Defensa Ank Bijleved Schouten a bisa cu un futuro insigur, unda menasanan ta aumenta, ta rekeri un Defensa cu por actua mesora. Pero pa logra esaki, mester di un inversion substancial , pasobra e organisacion actual no ta suficientemente y apropiadamente ekipa pa un atende cu e tiponan di menasa cu ta cambia constantemente.

“Nos no mester ta ingenio,” Bijleveld Schouten a bisa. “como sociedad nos mester bira mas resiliente y inverti den esunnan cu ta defende nos balornan. E homber y muhe cu ta traha den Defensa y ta cla pa duna nan bida. Defensa ta un tarea di Reino Hulandes y ta e responsabilidad di Marina y Ehercito Hulandes pa brinda proteccion na Reino, incluso e parti Caribense.”