(AP) — Investigadornan di seguridad cibernetico na Europa a bisa cu nan a descubri un defecto den un aligoritmo di codificacion (encryption) usa pa celularnan cu por a permiti pa spiona riba algun trafico di data durante mas di dos decada.
Den un documento publica ayera, investigadornan di Alemania, Francia y Noruega a bisa cu e defecto ta afecta e standard di data mobil GPRS – conoci como 2G.
Mientras mayoria di celular awo ta usa standard 4G of hasta 5G, GPRS ta keda un alternativa pa conexion di data na algun pais.
E vulnerabilidad den e aligoritmo GEA-1 probablemente no tabata un accidente, e investigadornan a bisa. Na luga di esey, probablemente a wordo crea intencionalmente pa duna agencianan di cumplimento di ley un ‘porta patras’ y cumpli cu leynan cu ta restringi exportacion di hermentnan fuerte di codificacion.
“Segun nos analisis experimental, pa tin seis number corecto den e loteria Aleman dos biaha tras di otro ta casi igual di probabel cu tin e propiedadnan aki di e yabi sucede accidentalmente”, Christof Beierle di Ruhr University Bochum na Alemania, co-autor di e documento, a bisa.
Tabata intencion pa elimina den fase e aligoritmo GEA-1 for di celularnan for di 2013 caba, pero e investigadornan a bisa cu a hay’e den smartphones actual cu sistema operacional Android y iOS.
Nan a bisa cu a informa fabricantenan di celular y organisacionnan di standard pa drecha e defecto.
