Un di e delaster decision cu a wordo tuma prome cu cambio di gobierno tuma luga tin di haber cu e pago di salario pendiente di un grupo di 90 ex empleado di Setar. Asina minister di Economia, Richard Arends a anuncia ayera durante su conferencia di despedida como minister di e gabinete Mike Eman II.
E mandatario kende lo forma parti como parlamentario di e fraccion di AVP entrante 27 di october awo a bisa cu ayera mes el a firma e decreto caminda ta finalisa e pago di e ultimo 60 empleadonan di Setar na momento cu e compania aki a wordo privatisa na aña 2003. E ta un suma di 4 miyon florin cu a wordo hinca den presupuesto pa paga nan.
E proceso aki a dura un poco largo –segun e mandatario- despues cu dia 14 di juli nan a pasa e ley cu a autorisa gobierno pa efectua e pago aki. “Pero tabatin un proceso basta minucioso, si por yame asina, riba detayenan pa loke ta trata datonan fiscal. Pero como tambe datonan bancario.” E ta spera cu pa final di e siman aki e sumanan ta wordo transferi ariba cuentanan di e 60 hendenan. E ta bisa cu e suma ta varia entre 800 florin pa persona te hasta 32 mil florin. Di e grupo di ex empleado aki di Setar ainda tin 6 caso individual cu mester atende di nan. Pero finalmente e minister ta kere cu finalmente e ‘odisea aki a conclu’”.
Antecedente
E tardansa den e pago aki tin di haber cu un disputa di casi 14 aña entre gobierno di e tempo ey y empleadonan di e compania di telecomunicacion pa un grupo di 90 empleado cu no a bay pa Setar N.V. cu a wordo ofreci un pakete. Pero e diferencia a surgi riba e base di formulacion cu a wordo uza pa e parti di salario. Despues di varios caso na maart 2016 hues a duna su sentencia explicitamente na fabor di 30 empleado, pero no pa e otro 60 empleadonan representa door di sindicato. Na december 2016 sindicato SEPPA hunto cu gobierno a yega na un acuerdo di principio cu tur 90 empleado lo wordo paga di e mesun manera, incluyendo interes legal for di 2005. E tabata algo cu e prome grupo di 30 empleado tabatin derecho riba dje pero pa evita mas caso den corte cu lo dura hopi aña decision a cay di parto di gobierno cu lo paga tur e grupo di 90 empleado di e mesun manera.
Pa e grupo di 60 empleado adicional a dicidi di bay parlamento pa haya autorisacion pa paga e suma di 2.5 miyon florin. Pero tambe pa e grupo di 30 empleado mester haya autorisacion como cu no ta Setar esun cu a haci e pago sino pais Aruba, pues mester haya un espacio den presupuesto pa atende cu e pago aki. El a gradici su colega di Finansa cu a coopera pa por logra e espacio aki di un total di 4 miyon florin.
