Mas control y mas colaboracion necesario

E discusion actual encuanto e ultimo decreto cu ta prohibi piscamento di cierto especie den nos awanan, manera semper, tin dos banda. En berdad tin tratado internacional cu cual nos mester cumpli. Nos tin obligacion pa cumpli, aplicando esakinan teniendo cuenta cu circunstancianan local, bao di esakinan interes particular economico o di otro indole di cierto grupo(nan).

Esaki no ta algo cu ta conta pa e tratadonan al caso so, sino cu e ta e filosofia general pa maneho di tur tratado internacional. Tumando esaki como punto di salida, ta bira obvio cu loke nos mester haci ta duna mas tanto posibel ehecucion na e tratado, contemplando e manera pa hacie, teniendo cuenta cu e gruponan di interes. A haci esaki? Obviamente no. A saca un decreto cu ta un simpel prohibicion, mientras cu e tratado no ta exigi cu e medida pa tuma mester ta un prohibicion total. Pasobra kico e tratado ta pidi pa haci? Preveni extincion di e especienan menciona. Esaki por ta prohibicion completo den caso hopi serio di peligro di extincion, y otro medida manera limitacion di pesca den cierto temporada di aña pa duna e especie concerni oportunidad pa procrea trankilamente. E limitacion den cierto caso por ta un cierto area, cerca o mas leu di costa, unda e tipo di animal aki ta procrea. Limitacion por ta tambe den forma di prohibi o limita recoleccion di webo, si esaki ta al caso. Tambe den forma di prohibi pesca bao di cierto tamaño, pa duna e especie tempo pa crece y yega na edad di procreacion. Articulo 4 di nos Visserijverordening ta contene explicitamente e posibilidad pa limita o prohibi pesca di cierto especie pa un cierto temporada, cu por evita un prohibicion den e forma cu a hacie awor.

Tur esaki a wordo tuma na cuenta? Nos no sa pasobra e detayenan ey no a yega na nos oido. Esaki ta naturalmente informacion cu mester bin for di e departamento(nan) concerni di gobierno. Ta di lamenta cu te awe nos ta haya nos cu caso manera esaki, unda e departamento ainda no ta comprende cu e era di djis hisa benta lo mester ta pertenece na pasado. E critica aki riba con a maneha e asunto, di otro banda no ta kita e legitimidad di ta desea di implementa maneho pa proteccion di e sortonan menciona. Sigur si tin di nan cu no ta asina relevante pa pesca mes y por lo tanto un prohibicion no ta toca interes economico.

E otro banda di e asunto ta e banda di e piscadonan concerni, cu ta consisti di dos grupo. Uno ta e grupo (chikito) di esunnan cu tin pesca como profesion y ta biba di nan actividad. Banda di esaki tin un grupo grandi di aficionado cu ta gusta e actividad, puramente recreativo o tambe pa gana algo extra den banda, loke tur ta completamente legitimo. Mientras nos ta haci e distincion entre e dos gruponan, tin interes nacional envolvi cu ta toca tur dos grupo por igual. Esey ta e papel positivo cu ambos por (y mester) hunga den proteccion di bida marino, unda ta trata di especienan dañino cu ta menasa existencia di otro especienan. E ehemplo grandi ta e Lionfish, unda ta netamente e piscado (cu harpun) por hunga un papel crucial pa limita e sorto dañino aki. E colaboracion aki ta dificil pa realisa si bo tin un prohibicion completo di harpun, cu cual nos no ta bisa cu nos ta na fabor di liberalisacion completo di uzo di harpun, pasobra e ora nos ta bolbe atrobe na e problema di pesca no permiti riba especienan protegi. Importante ta pa nos señala aki cu den e asunto aki, manera den hopi otro, nos mester colaboracion y no antagonismo, y esey ta exactamente e problema di un gobierno cu den ocho aña a acumula su porcion di arogancia y ta kere cu ta simplemente un cuestion di impone.

Di otro banda, e gobierno entrante lo mester comprende cu no por simplemente aboli e decreto y no haci nada al respecto. E piscadonan lo ta hopi contento cu esey, pero mester tin hopi di nan cu ta comprende cu e peligro di extincion di cierto tipo di bida marino no ta solamente un problema di gobierno, pero di nan mes tambe. Ora yega asina leu, pa negligencia di gobierno pa no atende e asunto, gobierno lo no solamente a keda sin cumpli cu e tratado, pero a lo largo esaki lo conduci na ausencia di e especie menasa, cu consecuencia cu lo no tin nada pa niun y ningun. E piscadonan lo a gana algo cu esaki? Claramente no.

Finalmente, aki atrobe nos ta bin topa cu e limitacionnan di nos gobernacion, unda no tin espacio pa realmente tin e cuadronan profesional trahando riba e aspectonan aki di gobernacion, ni den investigacion, ni den ehecucion y sigur no den mantenemento di supervision adecuado. Esey nos ta mira tambe den e pesca ilegal di stranhero cu ta hasta bin trece nan producto pa bende aki, sin permiso naturalmente. Ta bira tempo pa realmente atende e cosnan aki cu urgencia, a pesar di e limitacionnan financiero.