E ‘Executive Order’ cu Presidente Donald Trump a emiti sorpresivamente dialuna pasa, no tin consecuencia solamente pa e cuentanan di banco di gobierno Venezolano o su entidadnan gubernamental o empresanan liga na estado Venezolano, sino tambe pa cualkier persona o empresa cu ta haci negoshi cu algun entidad, empresa o persona cu ta liga na e regimen di Nicolas Maduro, na cualkier pais, no solamente dentro di teritorio Mericano, sino na cualkier otro luga.
Ademas e Orden Ehecutivo aki ta prohibi cualkier transaccion cu e personanan riba e lista cu OFAC (Office of Foreign Assets Control) di Departamento di Tesoro, cu ta sanciona. Esaki ta encera tur acto cu ta encera “materialmente asisti, sponsor, o provee apoyo financiero, material o tecnologico, o bienes o servicio na, o como apoyo na cualkier persona inclui na e lista di ‘Specially Designated Nationals and Blocked Persons’.”
Kico tur esaki ta significa pa cualkier compania na Aruba? Cu ta bira practicamente imposibel pa haci negoshi cu Venezuela, no solamente cu gobierno y entidadnan estatal, sino cu empresa priva cu posiblemente tin relacion cu e personanan sanciona. Ademas, pa hopi asunto, por ehemplo mester haya e permiso y licencianan necesario na Venezuela, loke ta bira casi imposibel pa haci, pasobra e ta implica colabora cu e regimen.
E ultimo paso aki di Presidente Trump ta cera porta practicamente pa haci negoshi cu Venezuela. E sancionnan anterior tabata limita tur cos bastante caba, sigur tambe cu e frontera entre Aruba y Venezuela cera. Pero esaki ta bay hopi mas leu pasobra e ta conta pa tur pais, no solamente compania Mericano o persona residencia na Merca. Ta trata tambe di e riesgo di keda exclui di acceso na e sistema di pago Mericano, cu tin hopi influencia riba e sistema di pago internacional, cu pa un gran parti ta tuma luga den dollar Mericano. Exclusion pa un compania ta algo serio, pasobra sin e acceso aki, otro transaccion financiero tambe a keda pega.
Y hasta si un compania logra haya autorisacion Mericano pa sigui opera, e situacion ta bira dificil di tur manera, cu costo legal aumenta y poco incentivo pa sigui opera na e pais o cu entidad di e pais, pasobra e peligro ta cu un compania cu cual ta haci negoshi ta ser uza pa e regimen evadi e sancionnan. Ora descubri esey, e compania cu a haci negoshi cu nan ta den problema.
Un di e aspectonan cu a keda exclui di e medida aki, ta e transaccionnan personal, manera e ‘remesa familiar’. Esaki pa por garantisa cu e famianan na Venezuela cu ta depende di placa cu nan hendenan ta manda di Merca, o via Merca, ta yega di tur manera. Ta di supone cu esey ta conta pa transaccion bancario desde Aruba tambe, aunke e mesun situacion na Venezuela ta haci cu transaccion bancario no ta sucede frecuentemente, manera un fuente di un banco comercial a confirma pa nos.
Ta parce cu, mientras no bin un realidad politico nobo na e pais bisiña, relacion economico lo ta necesariamente na un minimo.
