Standard internacional desde 1954

Aunke Aruba no conoce legislacion pa regula conducta di medionan di comunicacion, aparte di cu esey lo ta necesario of no, ni tampoco ta existi un gremio periodistico local cu ta maneha cierto norma periodistico, esaki no ta implica cu prensa ta traha den un bashi etico y moral. Banda di e stipulacionnan di nos Constitucion (den un articulo separa den e edicion aki), ta existi norma internacional specifico pa prensa y periodista, adopta pa hopi organisacion gremial nacional y continental. Base principal pa e normanan aki a surgi na aña 1954, tempo cu den congreso di Federacion Internacional di Periodista (IFJ; FIJ), na Bordeaux, Francia, a adopta e Declaracion di Principio encuanto Conducta di Periodista.

Te awe e Declaracion ta conoci como e ‘Declaracion di Bordeaux’ y incluyendo un amienda na 1986, ta fungi como e standard intermacional di conducta di periodista, pa trata di garantiza y defende periodismo di calidad y conforme etica. Pa periodista e ta e standard den acumula, transmiti, divulga y comenta noticia y informacion, describiendo suceso na henter mundo.

E reglanan basico aki ta:

  1. Respet pa berdad y pa e derecho di publico di haya sa berdad ta e promer obligacion di e periodista.
  2. Den cumplimento cu su obligacion, e periodista mester na tur momento defende e principio di libertad den recoleccion y publicacion honesto di noticia, y di e derecho di comentario y critica husto.
  3. E periodista mester reporta solamente di acuerdo cu hecho di cual e conoce e origen. E periodista no mester sconde informacion esencial o falsifica documento.
  4. E periodista mester usa unicamente metodo husto di obtene noticia, material fotografico y documento.
  5. E periodista mester haci tur su posible pa rectifica cualkier informacion publica cu a resulta di ta inexacto di forma dañino.
  6. E periodista mester tuma na cuenta secreto profesional encuanto e fuente di informacion obteni den confidencialidad.
  7. E periodista mester ta consciente di e peligro di discriminacion cu por ser magnifica pa medionan, y mester haci tur lo posible pa evita facilita tal discriminacion basa riba, entre otro, raza, sexo, orientacion sexual, idioma, religion, opinion politico o otro, y origen nacional o social.
  8. E periodista mester considera como delito profesional grave, lo siguiente:
    – plagio;
    – mal interpretacion malicioso;
    – calumnia, difamacion, acusacion no funda;
    – aceptacion di soborno den cualkier forma den consideracion di sea publica, o keda sin publica.
  9. Periodista cu ta merecedor di e nomber mester considera nan obligacion pa tene sagradamente cuenta cu e principionan formula aki riba. Dentro di ley general di cada pais e periodista mester reconoce den asunto profesional solamente e hurisdiccion di colega, cu exclusion di tur tipo di interferencia di gobierno of otronan.

Sea cu ta existi un cuadro legal of no, o un gremio local cu ta asisti den fomenta uso di e principionan di bon periodismo, por referi semper na loke e ultimo punto 9 aki ta bisa: organiza of no, esun cu ta yama su mes periodista di berdad, ta tuma e reglanan basico di bon conducta aki na cuenta, y ta importante pa publico en general ta na altura di existencia di e normanan aki, y reclama esnan cu no ta respeta nan.