Dia cu mi a wordo acerca pa Sra. Evelyn Wever-Croes pa uni mi mes na partido MEP, mi a haci esaki cu e intencion pa traha segun e meta comun di tene e hende central segun nos constitucion, cu tanto a bringa p’e; nos status aparte. Asina mi a cuminsa mi carera den politica cu e proposito di salbaguardia nos constitucion, nos hendenan y bienestar di Aruba como candidato riba lista di MEP y despues como Parlamentario di Aruba.  Semper mi a “stand up for what is right” (para pa locual ta husto y corecto) y ta mi intencion pa sigui haci esaki semper pa mi mes, pa mi famia y pa mi pais.

Na 2017 mi a huramenta dilanti Gobernador pa semper hasi mi trabou a base di principionan di honor, cu un consenshi limpi y sin presion of influencia externo (incluyendo di partido, coalicion of di podernan economico), pasobra e interes general di henter Aruba mester keda sirbi. Na fin di dia, segun nos constitucion, unbez bo huramenta como Parlamentario, bo ta eherce e privilegio di representa henter pueblo como controlado di Gobierno y legislador. Un tarea cu mi ta sigui segun articulo 1 di nos constitucion sin distincion di rasa, color, poder economico, creencia, origen, preferencia politico, sexualidad of genero.

Mi kier a enfatisa cu mi experiencia como controlado di Gobierno y legislador ta uno sobrio na unda mi interpretacion di nos constitucion ta cu lealtad mester ta na prome luga na Pueblo y cu mi asiento den Parlamento ta pa representa Pueblo na prome lugar y no interes partidista. Como legislador ta mi deber y obligacion pa amplia mi conocemento, particularmente conocemento huridico. Pa e motibo aki mi a escohe pa tuma e reto pa banda di mi trabao como Parlamentario cuminsa atende facultad di ley na Universidad di Aruba. Esaki danki na fondonan disponibel na Parlamentarionan pa desaroyo y mehoracion  di na conocemento y tarea como Parlamentario. E conocemento aki ta pa asina mi por evalua y contribui mihor na e creacion of adaptacion di iniciativa di leynan, pa percura cu nan ta bon hinca den otro y cu nan ta cumpli cu tur rekisito legal, di transparencia y di bon gobernacion cu ta primordialmente den beneficio di Pueblo di Aruba.

Recientemente den tratamento di ley di Serlimar, mi persona, conhuntamente cu conseho huridico di instancianan manera Raad van Advies y di otro expertonan tanto huridico como constitucional, a detecta inconsistencianan den e structura legal di e ley unda cu esaki lo por hiba na consecuencianan cu lo por mina e derechonan di e ciudadano unda cu segun interpretacion di e ley, lo otorga un compania estatal e poder di cobra pa un afvalstoffenheffing, es decir, belasting pa desperdicio, sin fundamento legal of declaracion di destinacion conciso con e fondonan aki lo wordo utilisa. Adicionalmente e ley tambe lo otorga e minister en cuestion e autoridad absoluto pa cambia e tarifa di e afvalstoffenheffing aki sin intervencion di gobierno of Parlamento. E falta di transparencia aki ta un punto di preocupacion grave, cual mester keda adresa, y na unda a purba di silencia y intimida mi cu e fin di sostene y proteha e coalicion actual. A sabiendas cu e formulacion di e concepto di ley aki tambe lo mina e derechonan di e ciudadano pa por haci bezwaar/entrega reclamo ora di tin un obhecion na un posibel cobransa. Esaki lo no ta husto pa e cuidadano. Na Departamento di Impuesto por ehempel, esaki ya conoce un procedura estableci y cu conoce su proceso legal sin costo adicional pa e cuidadano.

E ta un deseo di nos tur, pa hopi aña pa Parkietenbos wordo cera y soluciona, pa por proteha e salud y bienestar di esnan cu ta biba y traha den becindario, y tambe pa proteha nos medioambiente. Esaki no ta un reto cu por wordo soluciona solamente dor di un bes mas hinca man den cartera di e ciudadano sin mas, mirando cu tin hopi mas factornan importante cu mester wordo considera y cu no ta forma parti di e ley akinan. Es mas, e contenido di e ley aki, den mi opinion, niun caminda ta garantisa cu Parkietenbos lo wordo sera.

Mientras e ley ta exigi un aumento di entrada pa maneho di Serlimar, te dia di awe no a logra di substancia esaki door di produci un Business Plan, ni tampoco un plan operacional of di contingencia den caso di incidentenan ambiental. Mucho menos, un plan financiero cu ta defini e pakico di un aumento di tarifa y introducion di un afvalstoffenheffing (impuesto), sin presenta un specificacion di e gastonan adicional. No por impone un afvalstoffenheffing sin tin un afvalstoffenverordening existente, den otro palabra, pa ley bo no por cobra un impuesto sin cu tin un ley cu ta stipula esaki, dus sin un afvalstoffenverordening no por tin un afvalstoffenheffing, y esaki ta un di mi preocupacionan mas grandi cu e ley di Serlimar. Nos no por drenta den cartera di Pueblo sin mas.

Atraves di belasting di Pueblo, Land Aruba ya ta inyecta 22 miyon florin anualmente. Ta importante pa Serlimar tin su derecho di existencia, pero cobra pa un servicio ta un cos, pero impone un impuesto sin substancia financiero of legal ta un otro cos. E falta di transparencia di maneho aki no ta husto ni pa e empleadonan di Serlimar, ni pa e clientenan di Serlimar, ni tampoco pa tur e cuidadano, comerciante y turistanan na cual kier impone e afvalstoffenheffing (impuesto) aki.

Despues di hopi evaluacion, y tambe un combersacion cu Minister President Sra. Wever-Croes cu tambe ta lider di Partido MEP, y fraccion, mi a hañami ta tuma un decision hopi dificil.
Na ningun momento mi a uni mi mes na e fila di MEP cu e pensamento di bandona esaki, pero circumstancianan na caminda a cambia. Particularmente, ora mester a forma un coalicion, y unda cu accionan dentro di e coalicion lo por mina e bienestar general di nos Pais. Lamentablemente, hopi biaha e accionan aki ta wordo tolera pa asina por conserva e stabilidad di e coalicion y subsecuentemente e continuidad di gobernacion.

Mi ta sinti cu ora mi a para pa integridad, transparencia y bon gobernacion teniendo e hende central, mi integridad a wordo ataka por medio di rumornan infunda. Tur esaki paso mi no ta bai di acuerdo cu cierto ponencianan of leynan cu mi a considera di no ta contribui na rekisitonan di bon gobernacion. Mi a wordo tilda di “omkoperij” di comercio local. Hecho ta cu prome cu mi a drenta politica mi tabata un comerciante y esaki ta haci cu mi ta compronde e sacrificio diario di e comerciante chikito y mediano. Na mes momento mi ta comprende cu Gabinet Wever-Croes a hereda un situacion financiero desastroso y cu esaki mester wordo remedia lo mas pronto posibel. No obstante, nunca mester lubida cu e sector priva ta e curason di nos economia y contribuyente principal di caha di gobierno y como tal di finansas publico. Remediacion di nos situacion financiero mester bai man den man cu mehoracion di nos economia. Akinan tambe mi tin preocupacionan reinando pa falta di comprension pa e sector priva cu ta emplea mayoria di nos ciudadanonan.

Pa e motibonan aki, y pa mi por sigui hasi mi trabou pa cual mi a huramenta, mi ta kere cu no ta kedami otro opcion cu declara mi mes un Parlamentario independiente.

Esaki naturalmente no kiermen cu mi lo bai hiba un postura di oposicion, sigur cu no. Mi posicion como Parlamentario independiente lo brindami e libertad pa por contribui na un forma mas balansa, obhetivo y husto na interes general di nos Pais. Segun e principionan pa cual mi a huramenta y segun nos constitucion, na final di dia, e trabou di un Parlamentario, no obstante si e tin 100, 196, 2300 of 7,822 voto, ta pa sirbi e interes general prome cu esun di un partido of pa mantene un coalicion.

Mi semper a y lo sigui para pa bon gobernacion, transparencia y integridad, factornan cu ta parti di e motibo tambe pa cual mi a uni mi mes inicialmente na Sra. Wever-Croes y partido MEP, y cu ta e fundeshi pa e cambionan cu ta necesario pa por crea un futuro prospero y sostenibel. Mi ta kere Pueblo merece transparencia y ta sinti cu como mandatario y representante di Pueblo nos mester ta trahando den tur honestidad y cu tur mihor intencion pa sirbi e interes general sin distincion. E ta nos responsabilidad pa drecha e percepcion den Pueblo pa loke ta nos sistema democratico, y pa logra esaki mester percura pa restaura confiansa den nos organonan mas halto unda nos gobernantenan y representantenan di Pueblo ta traha.

Mientras mi sa cu mi accion kizas lo no cai den bon tera serca esnan cu ta kere ainda den politica tradicional of ta depende financieramente di politica tradicional, mi ta spera a la ves cu e por duna otronan cu tin duda den nos sistema democratico e speransa cu berdaderamente tin hende cu ta kere den hasi lo corecto y trese cambio, no obstante e obstaculanan y consequencianan cu e cambio aki ta rekeri.

Finalmente mi kier subraya e hecho cu como Parlamentario Independiente mi lo sigui adopta e vision di tene hende central y cumpliendo semper cu locual mi a huramenta p’e, di hasi mi trabao como un legislador y controlador di gobierno cu honor, consenshi y sin presion of obligacion politico of influencia di podernan externo. Asina ki mi ta pone mi mes disponibel como un voz di Pueblo y semper lo defende nos constitucion, e bienestar general  y para pa e derechonan di nos conciudadanonan.

E nificacion fundamental di kico un politico ta pa ami, kizas ta diferencia di otronan. Mi a cuminsa mi trayectoria politico cu e meta pa salvaguardia e bienestar general y derecho di tur ciudadano, pa haci mi parti pa contribui na e desaroyo di nos dushi Aruba y su hendenan, usando mi voz den Parlamento.

Mi kier a hasi uso di e oportunidad pa di curason gradici tur esnan cu di un forma of otro semper a sa di sostenemi y a deposita nan confiansa den mi persona.

E esencia di mi ser, principio, norma y balornan y locual mi ta inculca den mi yiunan ta pa para semper para pa locual ta husto, corecto y para pa locual bo ta kere aden. Pesey mi ta akinan awe, oficialmente anunciando mi retiro di partido MEP y alaves anuncia e comienso di mi trayectoria como miembro independiente di Parlamento cu lo continua na defende e derechonan di Pueblo di Aruba cu miho di mi abilidadnan y kier finalisa bisando esaki: Nos no mester tin miedo di “Para pa loke ta correcto, ni cu esaki nifica cu lo bo para bo so”

 

-FIN –