Ayera mainta pa 9or di mainta den Corte di Prome Instancia a tuma luga e caso sumario cu Gobierno di Aruba a entama contra sindicatonan SIMAR y SEPPA. Presidente di sindicato SIMAR, Sra. Josephine Albertus y abogado Sr. David Kock, ken ta representa e sindicatonan, a duna comentario na prensa na salida di corte.

Sra. Albertus a indica cu di nan banda tabatin pregunta pa nan di parti di hues unda cu nan por a duna nan splicacion. El a menciona cu loke a sali afo durante e caso ta cu Gobierno di Aruba ta esun cu a bin cu e recorte di 12.6% y no Hulanda. “Eynan caba ta un logro pasobra cada biaha den prensa nan ta bisa cu no ta nos, ta Hulanda y akinan awe a admiti”, el a bisa.

El a señala tambe cu hues a apunta cu Gobierno di Aruba ta keda ripiti cu nan ta trahando ariba algo structural, pero ya casi dos aña a pasa y ainda nan no a bin cu ningun cambio structural.

Segun Albertus a enfatisa, si wak e panorama di 2020 cu 2022 nan no ta mesun cos. Nan por a mustra tambe durante e caso cu Gobierno eigenlijk no ta honesto, pasobra nan ta bisa awo cu e trahadonan por haya 5% back di e placa cu ta wordo kita y nan kier kita dianan di nan cu no ta costa niun placa. Esey, el a señala, ta mustra cu Gobierno tin placa.

“E ora nos ta bisa cu ora bo sali afo bisa cu e situacion ta precario, e no ta cuadra, pasobra e ora bo no por duna placa a cambio di dia”, el a agrega.

Hues a indica nos cu dia 2 di maart e partidonan tin cu bay back corte. E mester tempo pa asina por studia tur cos bon. Albertus a menciona cu tin posibilidad cu hues ta yama nan prome si a caso e tin pregunta, e por tin un tussenbesluit of e por tin un eindbesluit.

Albertus a subraya cu pa nan esaki sikiera ta un stap dilanti unda hues a pone presion tambe ariba Gobierno cu nan no por keda bisa cu nan mester warda ariba finanzas. El a puntra ki solucion structural nan como Gobierno di Aruba tin pa e clase trahado cu cada luna ta kita for di dje, y eynan, segun el a remarca, ta unda Gobierno no por duna un contesta.

“Nan ta keda bisa nan ta bezig. Y algo cu nan a bisa cu nos a haya hopi sorprendente tambe ta cu nan a bisa cu e no ta cambia den dos dia y hues a bisa nan ‘bo no ta dos dia bezig, bo ta 22 luna bezig’. Kiermen bo no por bisa e no ta tuma dos dia. Eynan tambe pa den direccion di gobierno a mustra cu bo no por keda kita for di hende sin bin cu nada structural”, el a indica.

Albertus a expresa cu nan ta keda positivo cu na Maart ora nan bay back corte nan por mustra cu loke nan ta pidiendo no ta malo y no ta inhusto tampoco, pasobra pa 22 luna caba nan ta mustra cu nan ta trahando 100% mientras cu nan ta cobra 87.4%. Y Gobierno ta aplica riba nan ‘no work, no pay’, pero nan kier trabao sin paga, “dus e no ta logico tampoco”.

El a menciona tambe cu nan tabata bon representa durante e caso door di nan abogado David Kock. El a menciona cu nan tabata tur nan puntonan aden pa mustra cu local ta pasando ta un inhusticia y el remarca cu Kock a trece tur e puntonan ey pa dilanti.

“Nos ta para ‘kinan awe pa e clase trahado den veld di enseñansa, pero eigenlijk pa tur clase trahado, pasobra tur hende merece di traha na loke nan ta ser paga of bin cu un solucion. Nos ta warda te dia 2 di maart. Y nos ta gradici un biaha mas tur e sosten cu nos a haya tur e tempo aki, esey a pone tambe cu awe nos ta para ‘kinan y por bisa cu nos ta sigui cu nos lucha pa asina ey e derecho di e clase trahado por bin dilanti”, Albertus a expresa.

El a agrega cu nan puntra nan riba e parti di 5%, ya cu Gobierno a bisa cu nan por haya 5% back. Segun Albertus a splica, na mesa cu e sindicatonan Gobierno a bisa nan cu esey nan por duna sin aprobacion di Hulanda y durante e caso nan a haci como si fuera cu no ta berdad, cu mester bay CAft y Hulanda pa haya aprobacion. “Nos ta bisa eynan atrobe ta di lamenta, pasobra nos no tin pakico pa gaña. Y e ora bo ta wak cu toch tin trocemento di palabra y ya eynan e ta bira nos palabra contra di nan”.

Abogado di e sindicatonan, Sr. Kock a comenta cu e caso tabata largo y algun punto hopi importante, hopi interesante a sali afo caba, aunke mester warda te dia 2 di maart pa e decision bin.

Un punto importante cu Kock tambe ta remarca ta cu porfin a bira cla cu e 12.6% a sali for di Aruba y despues wordo acepta for di Hulanda. El a splica cu Hulanda a haya e propuesta di Gobierno, e propuesta concreto a bin di parti di Gobierno di Aruba cu a bisa nan ta bay corta 12.6% den e salario. “Hulanda ta keda bisa cu si nan kier pa e sosten continua, Gobierno mester tuma e pasonan necesario pa baha e gastonan di personal. Aworaki esey so nan ta ofreciendo, 12.6%, pero mester bin un oferta structural pa esey por desaparece”, el a indica.

El a indica cu nan a hiba un defensa basta largo pa ilustra pakico e infraccion aki riba e derecho di propiedad, e salario, di e trahadonan publico no por wordo hiba indefinidamente, pasobra na 2020 ora cu e ley aki a wordo introduci, e tabata un ley cu a bisa temporalmente mirando e crisis y mester a tuma cierto pasonan.

“Na nos opinion e situacion no ta manera dos aña pasa. Gobierno mes cada bes ta bisa cu nos ta progresando, nos a recupera tanto porcentahe y e ora ey mester yega na otro cu

e empleado publico”, el a bisa.

Otro punto cu e abogado a menciona, y cu e ta kere a e unico den historia, ta si hues lo mester bin cu un instruccion pa Gobierno pa bay Hulanda y bin cu un propuesta structural pa e problemanan cu tin na Aruba. “Dus no mas solucionnan temporal, un pleister ariba e herida, y mi ta kere si esey mester sucede e ta un respondencia nunca bisto”, el remarca

“Mi ta kere full nos sociedad mester di solucion structural. Esaki no tin nada di haci cu politica of solamente cu trahadonan publico. Structuralmente nos problemanan mester wordo soluciona y mi ta kere mester probecha e momento y disponibilidad cu tin pa cu esaki”, el a agrega.