Un cambio di ley aproba na juni na Corsou tin consecuencianan grandi pa un grupo grandi di Arubianonan cu ta haya pensioen for di SVB Corsou. Entrante 1 januari 2017 nan lo ricibi 10% di pensioen AOV menos.
Esaki ta conta pa tur Arubiano cu tabata biba pafo di Aruba prome cu 1986 (Status Aparte di Aruba). E grupo aki ta ricibi nan pensioen for di SVB Corsou como cu Corsou y Aruba a palabra esaki momento cu Aruba a sali for di Antias. Esaki ta conta tambe pa e pensioen di AWW (weduwen/weduwnaars- of wezenpensioen).
Parlamento na Corsou a aproba un cambio di ley cu tabata necesario pa drecha e fondo di AOV cu ta sufri di deficit structural. Pa garantisa e futuro di fondo aki, nan a cambia e ley riba diferente punto 29 di juni 2016. E cambio ta encera cu entre otro ta bisa cu un ‘ingezetene’ mester un adres tambe na Corsou, banda di un permiso pa biba na e isla aki y mester ta inscribi den nan censo.
E otro cambio ta cu awor ta haci un diferencia entre ingezetene y niet ingezetene. Esun cu ta ingezetene lo haya un pensioen mas halto, den sentido cu e suma ta keda igual pero Corsou ta baha e suma cu 10% pa esun niet ingezetene. Esaki ta conta pa esun cu tin derecho directo riba AOV, AWW y tambe partnertoeslag AOV, pues pa e partnernan di e pensionadonan.
Esunnan cu no ta biba na Corsou tampoco tin derecho mas riba un suma anual di gratificacion di Pasco. Esaki tambe ta conta pa e Arubianonan cu ta biba afo.
SVb Aruba
Arubianonan ya a ricibi un carta di SVB Corsou informandonan riba e cambionan. Un pensionado ta laga sa cu esaki a bin como un sorpresa como cu SVB Aruba tampoco a informa nan cu tin un cambio asina na caminda.
Ora di yama Svb Aruba, nan ta indica cu nan no sa di e cambionan na Corsou y tampoco kico e palabracionnan entre Corsou y Aruba ta momento cu Aruba a sali for di Antias. E pensionado ta indica cu e no ta haya esaki husto pa motibo cu parlamento/gobierno di Corsou no ta representa ciudadanonan Arubiano. Y asina e como Arubiano ta sinti su mes perhudica como cu e tin menos derecho den e caso aki.
