Decision a cay: Marisol cu POR

E tan espera decision a cay. Marisol Tromp ta uni forsa cu e partido POR den siguiente eleccion. Riba su escogencia por a bisa di antemano cu, si e tabatin pensa di continua den politica, anto esey lo tabata cu e iniciativa nobo aki. Y ta mas cu obvio cu e decision aki no lo keda sin consecuencia pa campaña y eleccion di e aña aki.

Na prome luga su participacion den e alternativa politico aki ta un refuerso considerabel pa e partido. Manera e mes a expresa, ta haci diferencia ora un partido no ta conta solamente cu hende nobo (den politica) sino tambe cu hende experimenta cu tin conocemento kico gobernacion ta encera den practica. Esey no ta tur cos, pasobra den e proceso di drenta, sali di partido bo no por confia cu bo ta mantene bo base electoral sin mas. Hay que ver…

Tambe, a keda cierto pregunta. Uno importante ta kico lo ta e influencia di Marisol riba e posicion di e partido encuanto e refineria. Nos ta corda e intervencion sumamente fuerte di Marisol durante tratamento di e contracto cu Citgo, unda e tabata para su so, pero tabata representa opinion di hopi ciudadano cu tabatin y tin ainda duda serio encuanto e contracto aki. Esey ademas di e manera antidemocratico y no transparente cu henter e asunto a bay, unda practicamente a forsa oposicion bay di acuerdo cu e ley, sin realmente por a balora e magnitud y consecuencianan di e contracto aki. Miedo pa perde voto den e proximo eleccion a haci cu oposicion, tambe Marisol su colega di partido nobo di PDR, a vota na fabor di un ley cu nan no tabata conoce a fondo. E escogencia tabata pa nenga di participa na tratamento di e ley, loke por a duna un señal fuerte, cu e partidonan di oposicion no ta acepta cu di e manera aki gobierno ta limita e derechonan di e poder legislativo.

Pero no a opta pa esaki, tambe pasobra e partidonan den oposicion tabata di acuerdo completamente cu e reapertura di e refineria, loke ta nan bon derecho. Hasta tabata claim cu ta nan intervencion a logra cu e acuerdo cu e empresa Venezolano PDVSA y su sucursalnan a keda logra. Den e proceso nan a pone un banda tur duda cu tabatin y cu ainda tin pa loke ta e maneho ambiental, entre otro, cu e empresa y gobierno di Aruba lo bay hiba, pa garantisa un medio ambiente aceptabel, cu Aruba y San Nicolas merece. Den e sentido aki ya caba tin motibo pa duda y preocupacion, pasobra henter e asunto di e deramento di asbest ilegal bao nanishi di e vecindario, sin cu realmente tabatin un reaccion adecua di e partidonan politico, ta crea e impresion cu lo no tin mucho oposicion pa maneho ambiental cu gobierno y e refineria lo bay hiba den futuro. No mester lubida cu e acuerdo cu Citgo a bin na bida sin cu tin bista riba legislacion ambiental adecua, y e posibilidad pa e refineria demanda daño y perhuicio pa legislacion ambiental cu ta bin na vigor despues y cu tin repercusion financiero pa nan.

Di otro banda, e asunto di e refineria por lo pronto ta un ‘fait accompli’, irespecto e opinion di e lidernan di POR cu por diferencia. Otro lo ta si den futuro mester tuma decision cu por trece e diferencia di opinion dilanti atrobe. Loke ta sigur ta cu e fortificacion di e lista di POR ta trece nos mas cerca di e posibilidad di un cambio fundamental di e paisahe politico, despues di cuatro periodo di gobernacion sigui cu un partido su so den gobierno. E forma di goberna aki riba su mes tabata un reaccion riba e gobiernonan di coalicion anterior, unda e conflictonan entre e partnernan di coalicion tabatin Aruba ‘cansa’. Awor Aruba, despues di 16 aña di gobernacion solitario, por resulta un poco ‘cansa’ di e formula aki tambe. Mas cu tur cos ora cu e partido den gobierno su so ta parce manera un bulldozer, cu no ta scucha ni tende nada, fuera di e grupo di hende di confiansa cu nan a reuni rond di nan.

Cada biaha atrobe nos ta mira e fenomeno aki, y den caso di e ultimo gobierno aki pio cu nunca, unda ta parce cu e actual prome ministro kier dicta tur cos na Aruba. Esaki nos por a mira den caso di e nombramento di gobernador, cu te awe pa nos ta e representante di Rey na Aruba, y no mucha manda di e prome ministro. Asina tambe su problemanan cu Conseho Consultativo y Contraloria General, unda e kier dicta ta kico nan mester conseha. Cu e probabilidad mas grandi di un proximo gobierno di coalicion, esaki ta cambia fundamentalmente e panorama pa eleccion na september. Pero lo bin un cambio tambe den estilo di goberna, mirando e fayonan di pasado, unda transparencia tabata parce palabra malo? Nos no sa.

Esey ta algo cu e partidonan mester tuma consenshi aden. Mientras tanto e dos partidonan grandi a haya algo pa tene na cuenta.