(ElNacional/EFE) – Decenas di Venezolano a manifesta ayera na Madrid pa exigi e liberacion di casi 300 preso politico cu, segun nan a denuncia, ta deteni den decenas di centro di detencion y tortura clandestino.

Den un concentracion na e centro di e capital Spaño, e Venezolanonan tabata compaña tambe pa algun ciudadano Spaño cu a demostra nan solidaridad cu e detenidonan aki den un acto den cual tambe na por a experimenta e situacion cu ta biba den e centronan di detencion di e pais, danki na bril di realidad virtual cu ta simula e situacion di e prison di El Helicoide, na Caracas.

Ex-alcalde di Caracas, Antonio Ledezma, cu ta biba na Madrid despues di sali for di Venezuela y ken tabata un preso politico y tabata bao aresto na cas, ta conta EFE cu e Venezolanonan den exterior kier ta e voz di e victimanan di violacionnan di derechonan humano na e pais.

“Ami cu tabatin e experiencia di ta un preso politico, di ta oranan largo den El Helicoide, lunas den e prizon, y despues di un aresto na cas, mi sa kico e ta nifica pa no wordo lubida. Y loke nos ta bisando for di e curason di Madrid y e porta di Europa cu ta Spaña, ta cu e Venezolanonan cu ta wordo tortura ta den memoria di e curason di esnan cu ta forma parti di e grupo den exterior,” el a expresa.

Ledezma a pidi Union Europeo y paisnan Europeo pa no lubida di Venezuela. El a recorda cu no solamente tin casi 300 preso politico na Venezuela, si no mas di 15mil Venezolano cu ta wordo someti na e regimen di presentacion na centronan policial y otronan cu ta wordo impedi di sali for di nan pais.

Den e mesun liña, Leopoldo Lopez a manifesta su mes dilanti e congregadonan y a sigura cu e lucha cu a hiba nan na prizon (e presonan aki) no a bay perdi.

“E sufrimento ey y e perdida di libertad sin sentido, e dianan ey cu ta bira lunas y añas cu nan tin deteni, mi ta spera cu e mensahe aki por yega na nan famia y cerca nan cu sentido di optimismo. Pasobra nos ta den un ciclo nobo di lucha cu a cuminsa dia 22 di october ultimo cu e victoria di Maria Corina Machado den e eleccion primaria di oposicion,” el a subraya tocante e proceso cu ya caba a husticia Venezolano a suspende.

Tocante esaki, el a asumi cu na caminda pa eleccion general di 2024 na e pais, ta bay tin hopi obstaculo, aunke el a manifesta cu e mas importante ta pa bisa e presonan politico cu e lucha ta bale la pena y cu nan ta riba pia.