Lar-Hof a emiti dia 9 di augustus ultimo un fayo orientador relaciona cu rechasonan ficticio, cu tin consecuencianan importante pa e procesonan legal administrativo na Aruba y ta contribui na e transparencia y claridad pa nos ciudadanonan.

E fayo aki no tin impacto solamente riba e panorama legal actual, sino cu tambe ta establece precendente pa futuro casonan den Lar, segun un comunicado di prensa. E fayo aki ta debi na e firme compromiso di Sra. Anouk Balentina, activista di medio ambiente y residente di area di dump, Parkietenbos, kende tabata considera cu e hindervergunning emiti pa e incinerador na Parkietenbos no tabata tene suficientemente na cuenta e interesnan di e residentenan local, manera nan derecho na un ambiente di bida saludable y trankilo.

Balentina a cuminsa su lucha despues cu gobierno a emiti en secreto e hindervergunning – cual ta un ‘permiso pa molester’. Basa riba e Lar (Landsverordening administratieve rechtspraak), el a presenta un obhecion contra e emision di e permiso aki.

E proceso legal di e procedemento Lar na Aruba ta compleho y por ta prolonga. Un caracteristica di e procedemento aki ta cu den hopi caso, gobierno no ta responde na e obhecionnan na tempo, loke ta resulta den un ‘rechaso ficticio’. E rechaso ficticio aki ta diferente na Aruba cu esun di Corsou y Sint Maarten, ya cu e Lar di Aruba ta establece cu mester considera un rechaso ficticio como un decision di rechaso. Balentina a hiba e caso aki dilanti di e hues di Lar den prome instancia.

A pesar di e exhaustividad di dossier, hues no a drenta den e contenido di e caso. Normalmente, e hues di Lar ta considera cu un apelacion ta valido na momento cu tin un rechaso ficticio (fictieve weigering), simplemente pasobra e rechaso ficticio di e obhecion no tabata fundamenta. Sinembargo, Balentina tabata buscando un decision di Lar-Hof riba e actuacion di e hues den prome instancia, sosteniendo cu e hues mester a trata e caso den su contenido.

Den e fayo aki, Lar-Hof a duna consideracionnan amplio no solicita, locual ta notable ya cu huesnan generalmente no ta duna consideracionnan superfluo. Lar-Hof ta sostene cu e hues tambe por trata e caso den su contenido. Lar-Hof ta enfatisa cu den futuro, e hues di prome instancia mester splica su decision di un manera solido y tambe ta duna guia pa e huesnan por tene den consideracion na momento di tuma un decision.

E decision aki di Lar-Hof haci cu e huesnan di prome instancia di Lar na Aruba tene consideracion pa cu e rechasonan ficticio. Awo e ciudadanonan di Aruba por evalua si a tene e indicacionnan di Hof na cuenta den funcion di e decision aki. Si esaki no ta e caso, por solicita e opinion di Lar-Hof. Di e manera aki ta motiva tur hues di Lar di prome instancia na Aruba pa keda alerta.

Aunke tin hende cu por argumenta cu Balentina a perde su caso, segun un comunicado di prensa, e no ta kere cu esey ta e caso. Su obhetivo tabata pa pone na prueba dilanti di Lar-Hof e procedemento standard di e huesnan di prome instancia di Lar relaciona cu e rechasonan ficticio. Awo Lar-Hof a pone e procedemento aki den un marco huridico mas detaya. For di awo bay dilanti, e hues di Lar di Aruba lo mester duna un splicacion adecuado di su fayo riba rechasonan ficticio y tambe lo por examina e contenido. Cu esaki, Balentina a contribui na e formacion di hurisprudencia na beneficio di e ciudadanonan di Aruba den ambito di Lar.

Den su sentencia, Lar-Hof no ta señala cu Balentina ta carece di legitimidad ni tampoco cu su apelacion ta falta fundamento. Lar-Hof solamente ta establece cu e fayo di e hues di prome instancia por mantene, ya cu e indicacionnan di Lar-Hof ainda no tabata conoci e tempo aya.
Ta spera cu e examen material di e apelacion cu respecto e decision posterior riba e contenido di e obhecion ta bay tuma lugar na september.

Independientemente di e resultado di e caso aki, tin un cos ta sigur: e persistencia y dedicacion di Balentina pa garantisa e derechonan di ciudadanonan di Aruba ta innegable. El a tuma un paso historico dilanti pa estado di derecho na Aruba y a manda un señal poderoso tocante e influencia di activismo ciudadano, segun e comunicado.

E sentencia completo ta disponible riba https://uitspraken.rechtspraak.nl/#!/details?id=ECLI:NL:OGHACMB:2023:146

Lar
E Landsverordening administratieve rechtspraak (Lar) ta referi na legislacion cu ta goberna ley administrativo y e revision hudicial di decisionnan administrativo na Aruba. E Lar ta delinea e procedura y reglanan pa trata disputa y accionnan legal relaciona cu decisionnan administrativo haci pa autoridad y agencianan gubernamental na Aruba.

Esaki por inclui asuntonan manera permiso, licencia y otro accionnan administrativo. Lar ta duna un marco pa individuo, negoshi y organisacionnan por reta e decisionnan administrativo en cuestion mediante proceduranan legal. E ta establece e hurisdiccion di corte administrativo, e derecho di individuonan pa apela decisionnan administrativo, y e proceduranan pa conduci e apelacionnan en cuestion. Lar tambe ta delinea e principionan di ley administrativo cu autoridadnan gubernamental mester ucmpli na momento di tuma decision y interactua cu ciudadanonan.

En general, Lar ta un instrumento legal esencial cu ta sigura transparencia, husticia y responsabilidad den asuntonan administrativo dentro di hurisdiccion di Aruba.

Incinerator na Parkietenbos
 Na juli di 2021, hurista y habitante di Parkietenbos Anouk Balentina ayera a entrega un obhecion den cuadro di e LAR contra e otorgamento di e permiso pa molester (hindervergunning) pa opera e incinerator na Parkietenbos. El a argumenta cu tabatin cantidad di iregularidad den e proceso aki, entre otro: e obhecion di habitantenan no a wordo scucha, gobierno a ignora varios rapport y conseho cu tabata indica cu Parkietenbos no ta e luga indica pa e incinerator y finalmente a otorga e permiso secretamente.

Manera Balentina a indica, e otorgamento di e permiso pa molester a tuma luga di forma clandestino, mirando cu casi 6 luna despues mediante Landscourant di 4 di juni 2021, a publica cu e permiso a wordo otorga dia 23 di december 2020. E permiso aki ta necesario pa opera e incinerator.

Si no tabata suficiente cu gobierno ta actua sin transparencia pa otorga e permiso, Balentina ta trece dilanti den su carta di obhecion cu departamento huridico DWJZ (Directie Wetgeving en Juridische Zaken) no a contesta e 80 persona cu a entrega un obhecion practicamente casi igual. Como motivacion, director di DWJZ, George Croes a yega di indica den un conferencia cu tabatin mucho hopi obhecion contra e otorgamento di e permiso pa contesta tur. Balentina ta haya cu e excuus aki no ta valido pasobra contesta e obhecionnan ta un exigencia segun e ley di molester (Hinderverordening). Balentina ta haya cu e manera di opera aki, unda ta publica notificacion cu e permiso a wordo otorga 6 luna despues, ta blokia e derecho di e ciudadano pa busca proteccion legal contra un decision di gobierno na tempo.

Ademas, Balentina a indica cu ademas cu tin iregularidadnan den con e otorgamento a bay, gobierno a hasta ignora un cantidad di recomendacion di su departamentonan den e proceso pa pone e incinerator y oper’e na Parkietenbos.

December di aña pasa, minister Ursell Arends a indica cu ainda lo sigui kima e slib di RWZI den e incinerator na Parkietenbos, “temporalmente tanten no tin un RWZI nobo.”