Otro departamento cu ta resorta den e ministerionan cu ta cay bou e maneho di e mandatario, Otmar Oduber, cu lo conoce algun cambio ta Departamento di City Inspector (DCI) pa implementa y reenforsa e ley y cuminsa duna boet pa esunnan cu no ta cumpli cu nos ley.

Minister Otmar Oduber a bisa cu dos siman pasa nan a cuminsa cu e Buitengewoon Opsporingsambtenaar (BOA) Opleiding pa e diferente ambtenaar na servicio di e departamentonan cu ta realisa trabou di control, entre na DOW, DTI, City Inspector, etc… Pero pa loke tin di haber cu e departamento di City Inspector e implementacion di e curso aki pa nan personal ta keda un problema. Segun e mandatario, den e añanan cu a pasa y den e gobiernonan anterior no a percura pa tuma persona suficientemente cualifica pa por atende e tipo di curso aki; y e BOA Opleiding no por a tuma luga den e departamento aki.

E ta haya cu e tarea cu DCI ta hopi importante y a pesar di e instrumentonan hopi limita cu nan tin, nan no por duna boet. Sino cu nan ta raporta via proces-verbaal na Ministerio Publico (OM), pa e instancia aki duna boet den caso cu por duna boet. Pero awor cu e BOA Opleiding, nan no lo tin mester di haci uzo mas di OM, sino cu e personal capacita di e departamentonan cu ta haci control por duna boet.

Pero como mandatario, e ta bay sigui insisti y den e caso aki e ta papiando cu su colega di husticia, pa den cierto caso nan por haci uzo di miembronan di polis. A pesar cu nan ta consciente cu tin un limitacion caba di polis pa nan por uzo di un of dos polis na disponibilidad di e Bureau City Inspector pa di e forma aki nan por actua na momento cu nan tin cu haci control.

Ponemento di ordo

Igualmente dos siman pasa –segun e mandatario- nan a purba di pone ordo den e departamentonan. Den e caso aki el a referi cu nan por tuma nota den social media cu durante oranan di trabou un grupo grandi di trahadonan DCI a bay celebra cumpleaño tambe na cas di un trahado. E mandatario a declara cu cada un di e empleadonan aki a haya un advertencia. El a bisa cu simplemente nan no por permiti pa un tipo di cos asina por tuma luga mas den gobierno.

“Tabatin no libertad! Tabatin un libertinahe cu a wordo crea bou e gobierno anterior, como si fuera cu e ambtenaar por haci loke e kier desea y no tin un consecuencia pe,” el a bisa.