Debi na espacio financiero limita: ATA no por expande apesar di hopi demanda

Tin demanda pa nos producto turistico, pero nos espacio financiero limita ta haci cu Oficina di Turismo di Aruba (ATA) no por a bay mas pisa den e mercadonan potencial aki. Esaki a pesar cu turismo, cu ta nos principal sector economico, ta sigui registra cifranan positivo.

Pa directora di ATA, Ronella Tjin Asjoe-Croes e desaroyo aki ta uno satisfactorio, pero e no ta descarta cu tin retonan nos dilanti. Un reto tin di haber cu nos mesun producto turistico. Otro reto, cu nos a logra surpasa parcialmente, ta Venezuela. Pero otro reto ta relaciona cu ATA su espacio financiero limita. Nan ta purba di contraresta e retonan aki pa medio di decision ‘consciente’, y un di nan tin di haber di pusta riba e mercado Mericano.

Tjin Asjoe-Croes ta premira cu tin crecemento na caminda, y nan ta aplaudi e crecemento aki. Pero e mester ta di un manera ‘sabi.’ Aruba mester ta consciente riba e manera con nos kier crece. E ta haya cu esaki mester ta uno cu sigur ta representa e producto Aruba, pa asina nos industria por captura e bishitantenan di ingreso mas eleva den e mercado cu nos ta promove e producto Aruba.

Espacio financiero limita
Un aspecto cu directora di ATA a categorisa como un reto ta relaciona cu nos producto turistico mes. Segun Tjin Asjoe-Croes, nos mester ta consciente cu nos tin un ‘producto madura’ y ainda hopi gusta. Pero den cuadro di esaki ‘nos tin decision hopi clave pa tuma’.

Lamentablemente nos espacio financiero ta limita, cu ta haci cu nos no por expande, manera nan a yega di haci den añanan anterior. E no ta un aspecto di demanda, ya cu tin hopi demanda pa Aruba. “Mare nos tin mas espacio, pasobra nos por bende mas Aruba,” el a expresa na Bon Dia Aruba.

Capacidad di camber versus ingreso
Considerando e espacio financiero limita aki, ATA su filosofia ta cu locual nan ta dispone di dje, nan tin cu zorg pa atrae e hendenan cu por laga mas ingreso pa cada persona riba nos isla. P’esey e decisionnan aki mester ta uno consciente y sabi. Esaki ta exigi cu nos mester eleva e ingreso pa cada bishitante, pa asina por yega na e incremento di ingreso pa nos pais, y no pa via di redobla nos capacidad di camber.

P’esey e ta haya cu mester tene cuenta cu e inventario y decisionnan riba nivel di acomodacion. Pero di otro banda, ATA ta contento di por a mira e parti di diversificacion den turismo, cu ta bin hayando un prioridad. ATA a yega di realisa e tipo di estudionan riba capacidad di carga, segmentonan cu tin un miho representacion pa nos turismo y cu nan ta nifica mas oportunidad y ingreso pa nos isla. Tur e estudionan aki ta permiti ATA pa purba yuda y duna conseho. Tambe pa sigui inverti unda por haya desaroyo den cierto segmentonan clave pa Aruba, y asina por sigui genera ingreso mas eleva pa medio di turismo.