E busnan pa Arubus mester a keda pa entrega pa fin di luna october, pero un desaroyo a presenta na caminda cu no por a haci entrega. General Manager di Jossy Motor ta splica dicon.
General Manager Cesar Tromp a bisa cu e comapnia a keda cla cu cierto asunto tecnico y pa otro siman lo entrega dos bus cu ta cla caba pa Arubus. Mientrastanto lo haci algun ahuste cu mester nan a haya necesario pa asina entrega e busnan ‘netjes’.
Asina por entrega e prome 7 busnan cu tin. Tromp ta amplia bisando cu mester a haci ahuste den e fluho di aire pa e airco por traha optimalmente. Nan tabata depende di e compania di Brazil cu mester a bin pa haci e check up. Mirando e temperatura y clima di Aruba, nan mester a haci cierto ahustenan necesario pa aclima e busnan.
E fabrica a tuma encargo pa tur cos sali bon caminda e airco di e bus por tin un funcion largo cu no mester haci un ahuste despues di tiki tempo. El a splica cu a laga tur cos den man di e fabrica pa asina nan por haci nan trabou y despues Jossy Motor por entrega e producto bon.
Sinembargo e ta compronde cu tabatin algun contratempo pero e ta kedando cla. Cu ta mesun compania di nan garantia a tuma e responsabilidad di nan trabou ‘ta haciendo e trabou mas lihe riba dje’.
Nan a purba haci e proceso mas lihe y pa motibo aki entrante otro siman nan ta entrega e prome bus. Asina cu e prome busnan cuminsa sali, e proceso lo cana mas lihe, Tromp a splica.
E ta bisa cu e airco tabata e unico problema cu tabatin y awo ta cla y di nan banda no tin nada mas. Nan a haci tur test riba e bus y core cune. Pero segun Tromp esaki ta algo cu ta normal, mirando cu cada cos nobo cu drenta mester wak ki detaye mester aclima na e pais su clima y situacion, condicion y clima y esey a cay bou compania di Brazil pa entrega bon.
