(EFE) – Consumo di combustibel na Argentina a baha despues di e aumento di prijsnan for di december ultimo, un aumento cu ta bay continua debi na politica di gobierno nobo di Javier Milei pa sector di hidrocarburo.
Segun varios fuente di e sector aki, e demanda di combustibel den e stacionnan di gasolin a baha na januari casi cu un 10%.
E disminucion di consumo a cuminsa sinti caba na december, cu un recorte di 7,8% pa november, segun datonan di Instituto Argentino di Energia ‘General Mosconi’.
Pa motibo di un inflacion super halto y perdida di poder di compra den e salarionan di Argentina, e consumidornan a recorta nan consumo den e stacionnan di gasolin despues cu e prijsnan aumenta na december, januari y na comienso di februari.
E ‘Naphtha super’ cu ta un parti di petroleo natural cu por ser haya den e destilacion di gasolin (esun di mas economico na mercado di Argentina) ta ser bendi actualmente na 87 cen di dollar pa liter na stacionnan di gasolin na Buenos Aires pa YPF, e productor mas grandi di hidrocarburo y comercialisador di combustibel na Argentina.
Te november 2023, e balor di e Naphtha super na capital a acumula un aumento di 107% den e aña, mas abao cu e inflacion di 160,9% acumula aña pasa.
Pero na december a registra un subida mensual di 77,8% y na januari, un di 26,4% producto di e politica nobo di Ehecutivo di Milei pa asina libera e prijsnan congela di economia, y den e caso di combustibelnan, hiba nan na nivelnan mas adecua cu mercadonan internacional y mas rentabel pa empresanan di e sector.
Na esaki, a suma un otro aumento di 6,43% 1 di februari ultimo, debi na decision di Gobierno di activa un actualisacion na cierto impuestonan riba combustibel cu e administracion anterior a atrasa y pa loke ta spera un aumento nobo pa maart y mei.
Den scenario aki, e prijs di Naphtha a acumula for di december un aumento di 139,2% hopi mas halto na e evolucion di e tasa di inflacion, di 25,5% na december, segun datonan oficial y di 19,4% na januari, di acuerdo cu calculonan.
Prijsnan di combustibel ta nifica un peso fuerte den e costo di transporte di carga, den e generacion di coriente y den e logistica di agricultura, entre otro actividadnan, por lo tanto, ta influencia hopi den formacion di prijsnan di economia general.
Durante añanan, e prijsnan di combustibel na Argentina tabata fuertemente regula. E pais aki ta importa cerca di 30% di e demanda di mercado domestico di Naphtha y gasoleo, e resto ta cubri cu crudo produci y refina localmente.
Pero gobierno nobo cu a asumi na december ultimo a dicidi di caba cu e denomina “bari crioyo,” un prijs subsidia di crudo pa mercado domestico di 58 dollar –compara cu e bari actual di Brent di 79 dollar,- lo cual tabata permiti mantene “stand by” e prijsnan di combustibel.
