E decision di gobierno di declara e dia di awe como dia liber, apesar cu no tabatin celebracion di Carnaval a trece diferente opinion cune, entre nan di Camara di Comercio (KvK) y tambe di hurista.

E biaha aki, Bon Dia Aruba a acerca presidente di FTA, Hubert Dirkzs, un sindicato cu ta representa mayoria di e trahadonan di e sector priva, principalmente di horeca -tanto di hotelnan y restaurantnan- cu ta e fundeshi di nos economia.

Di banda di FTA como sindicato nan a debati e asunto aki cu hopi compania, caminda algun di nan ta bisa cu si ley ta bisa asina, nan no ta bay dun’e. Ley ta bisa cu si no tin parada no tin dialuna liber, y tin companianan cu no ta dun’e.

Pero otro companianan a bisa cu dor cu ya nan a tene e dia ey plania caba den nan agenda di actividad, y pa nan bay cambi’e, nan a prefera di lag’e asina, manera cu e tabata for di principio. Y no warda te ora bin un caso den corte. Esey a haci cu hopi compania a dicidi di duna awe e dia liber. Y esun cu ta traha ta haya pago di 200%.

Aworaki FTA ta bay wak kico ta bay pasa, pasobra tin cantidad di compania cu no lo dun’e y e trahadonan kisas no ta bay acepta esey, y lo por bin caso den corte. Di otro banda presidente di FTA ta compronde cu tin companianan cu tambe kier hiba gobierno corte, pasobra nan ta haya cu gobierno a haci incorecto. Riba e punto aki FTA ta kere cu gobierno a haci un apelacion. “E no a decreta cu tabatin un dia liber,” Dirkzs a bisa. Sino cu anticipando e cambio di ley, Gobierno a haci un apelacion na e companianan pa duna liber awe.

Den principio FTA ta kere cu por mantene liber dor cu e trahadonan ta conta cu esey. Pero e ley ta duna e compania espacio tambe pa scapa placa, pasobra e ora mester paga 200% pa esunnan cu ta traha. “E ta un poco fastioso. Kisas e por a bay miho,” el a bisa.

Dialuna liber

E sindicalista a declara cu riba e dia liber di awe dialuna 15 di februari, manera e ley ta poni cu ta bisa cu si no tin parada di Carnaval, no tin dialuna liber. Pero awor gobierno a dicidi pa duna liber anticipando un cambio di ley. Gobierno kier haci’e di tal forma cu e liber no ta bay ta mara na e parada di Carnaval mas. Sino cu e ta bay ta mara na e Diaranson di Shinishi. Kiermen dos dia prome cu e Diaranson di Shinishi, e ta bira liber, y asina e ley no ta bay papia nada di Carnaval.

Dirkzs a declara cu den principio si nos ta bay riba e origen di e dia liber di e dialuna di Carnaval, e ta compronde cu Dia di Pinksteren (Pentecoste) cu tabata un dia liber, pero a wordo hala pa bira Dialuna di Carnaval. Sinembargo e descripcion di e ley a wordo poni cu ta liber ora cu tin Carnaval. Tabatin 11 dia liber pa aña caminda e dia ey tabata un dia liber oficialmente caba, solamente cu nan a hal’e di un dia pa otro.

Pero den todo caso e sindicalista ta spera cu por tin comprondemento di ambos banda. Tin caminda cu companianan ta compronde, y tambe tin caminda cu e trahadonan ta compronde y nan no ta haci’e dificil.

Si esey ta e caso FTA ta mira cu no lo bay tin mucho problema pa bin cu caso den corte. Pero mester wak kico ta e resultado di un dia manera awe cu den cierto momento a bira un batata cayente cerca gobierno. Te ayera FTA no por pronostica nada, sino despues di awe of ora di pago, nan lo haya sa kico ta e situacion.