Debi cu Hulanda tin desconfiansa; Gobierno a pidi IMF pa valida cifra di cuenta nacional

Prome Minister, Evelyn Wever-Croes a indica cu Aruba tabatin añanan sin cu Oficina Central di Estadistica (CBS) por haci e cuenta nacional. Pero a base di e cuenta nacional cu CBS a haci for di 2015 te cu 2018, gobierno por haya un rapport preliminar di e instancia aki.

E rapport aki ta bisa cu nos GDP a crece mas di loke a wordo tene cuenta cune anteriormente, segun e mandatario. E no sa y tampoco no ta compronde te dia di awe, pakico e gobierno anterior no kier a tene cuenta cu un GDP creciente. Ya cu e por a yuda nan evita hopi problema cu Hulanda.

El a splica cu aworaki cu e cuenta anual a wordo haci, ta bin resulta cu e GDP ta mas halto cu locual a wordo tene cuenta cune. Esey ta pone cu bo debe compara cu e porcentahe di bo GDP ta baha, pero finalmente e ‘debe ta keda igual’, el a bisa.

Den e reunion reciente cu gobierno a sostene cu colegio di supervision financiero (CAft), nan a papia di dje tambe. Segun e prome mandatario, e situacion di desconfiansa entre Hulanda y Aruba, specialmente pa loke ta e cifranan di e gobierno anterior, ta asina grandi, cu Hulanda no kier acepta e cifranan. Awor Gobierno a pidi a Fondo Monetario Internacional (IMF) pa valida e cifra di nos propio cuenta nacional. E validacion lo keda cla e luna aki of luna di december proximo.

IMF lo duna su opinion ariba nos GDP, y unabes cu e instancia aki ta duna su validacion, nos por bisa cu pais Aruba ta conta cu un GDP ahusta. Te ainda gobierno ta ahustando na e GDP anterior, te ora cu e validacion di IMF lo bin cla.

CBS y cuenta anual.
E prome mandatario a bisa cu unabes cu nan a drenta den gobierno, CBS a bisa nan cu pa hopi aña gobierno anterior no a inverti den CBS pa nan por a haci e cuenta nacional. “Door cu nan no kier inverti den CBS, CBS a keda calcula ariba pronosticonan y cierto momento esey no ta wanta mas,” el a bisa.

Premier Wever-Croes a bisa cu esaki no ta un situacion deseabel. Como pais nos mester di un CBS cu por funciona bon y cu por haci e cuenta anual tur aña, pa bo por adapta y prepara bo mes miho.

Na aña 2017/2018, minister di Finansa a tene un reunion cu CBS unda a keda palabra cu gobierno lo pone placa disponibel pa inverti den CBS pa por traha cuenta anual y bay bek te 2015, cu ta 3 aña. Nan ta haya cu mas leu cu esey, ta placa hinca den algo cu no ta bay yuda bo mucho.