Durante e apertura festivo di Veiligheidshuis di Aruba procurador-general (PG) di Aruba Alexander van Dam a enfoca riba e debernan di ciudadanonan na Aruba pa nan yiunan.
“Porfin nos tin un lugar unda e cadena di cuido y husticia ta bin hunto. Pero mas cu claro Veiligheidshuis no ta bay soluciona tur problema social cu tin na Aruba. Ciudadanonan di Aruba tambe tin nan debernan. E deber pa laga nan yiunan bay scol y e deber pa no usa violencia contra nan pareha y nan yiunan”.
Tin casonan compleho segun e procureur-generaal cu no por soluciona solamente den forma hudicial. Esaki como e casonan tin problemanan social na base.
“Na Aruba tambe nos ta mirando esey mas y mas, cu casonan ta bira mas complejo, cu tanto e necesidad pa solucionnan social como pa programanan preventivo, den cual polis y Ministerio Publico (OM) tin un rol grandi”.
Morto di dos mucha
Riba tereno social tin hopi trabao, e ta constata. Por ehempel riba tereno di cuido di adiccion, cu mester wordo reforza, y na enforza leerplicht, cu ta asina importante pa muchanan, y na bringa violencia relacional.
E morto tragico di e dos muchanan aña pasa, a accelera e proceso pa lanta Veiligheidshuis. E partnernan den e cadena di cuido y di husticia a enfatiza y sostene e importancia y necesidad di e Veiligheidshuis den nan presentacionnan na conseho di minister, asina OM ta informa.
“Crimennan grave, manera e morto di e dos criaturanan, mester wordo preveni y cu ta vooral e partnernan social cu awor tin cu sali pa dilanti. Ministerio Publico ta semper e ultimum remedium”, asina e PG entre otro a bisa awe mainta.
