Ayera a tuma luga e reunion publico tocante caso di minister Paul Croes cu oposicion a pidi un luna pasa. Despues cu a pone e minister pa 30 dia riba “non actief” te dia di awe no tin informacion amplio tocante kico lo pasa cu e minister den futuro. Segun declaracion di prome minister, gobierno di Aruba a opta pa mira leynan di St. Maarten pa actua riba e caso aki mirando cu na Aruba no tin ley cu ta cubri situacion manera esun cu Paul Croes ta aden.

A duna departamento legal di gobierno orden pa a base di ehempel di St. Maarten, crea algo pa Aruba por uza den un caso asina. Lo presenta e producto final den parlamento ora cu ta asina leu segun prome minister Mike Eman. Nan a opta pa tuma e carteranan di minister Croes temporalmente. Sinembargo e prome minister a admiti cu Paul Croes mes a sugeri pa tuma su retiro. Dicon gobierno no a honra esaki, no ta cla.

‘No stroba campaña’
Den e constitucion di St. Maarten ta haci un diferencia entre un sospechoso y un persona cu ta condena ora ta trata casonan asina. Den e Staatsregeling articulo 36 di st. Maarten, un minister condena sin oportunidad pa apelacion mester wordo retira mesora di su funcion. Den e caso di un sospechoso sin embargo e ta wordo suspendi si ta un detencion temporal consecuencia di un crimen cometi. Premier Eman a subraya cu ta importante pa uza esaki pa ilustra cu na paisnan manera Merca ora cu por ehempel kier a cuminsa caso contra Hillary Clinton, no a stroba su persona di core campaña pa bira presidente di e pais.

“Ora cu bo ta un acusado, ta diferente cu ora cu bo ta acusa. Cada persona por tuma pa su mes kico e ta haci. Pero esunnan cu ta aplica regla, esunnan cu tin cu wak cada caso a base di terminologia obhetivo, tin e tarea pa haci un diferencia entre ora cu un persona ta sospechoso, acusado, of ora cu un persona ta condena caba,” sr. Eman ta bisa.  E investigacion ta keto bay andando y no por condena minister Croes ainda. “Un minister cu ta sospechoso no por wordo condena cu un retiro si ainda e ta forma parti di un investigacion. Proteccion pa gobierno por wordo utilisa na momento cu un minister of parlamentario wordo ta acusa di un delito”, segun e prome minister.

Bon Dia Aruba kier remarca cu St. Maarten no tin mesun leynan cu na Aruba (lesa mas den editorial riba pagina 5 di e edicion aki).

Reaccion di oposicion:  A desvia completo for di topico
Lider di fraccion MEP Evelyn Wever Croes ta bisa cu e reunion a cuminsa hopi bruha ayera. Na momento cu e presidente di parlamento a tarda pa yama reunion akinan caba cosnan a cuminsa fout segun e ta bisa nos.  “A viola e reglamento di ordo pasobra e reunion mester a tuma luga den 30 dia despues cu e minister a wordo poni den non actief.  AVP a desvia completo for di e topico y  ta haci manera mi integridad a wordo cuestiona. No a toca e tema mes di e minister den cuestion. E pregunta mas crucial cu mi persona tabata tin ta lo siguiente: Kico ta e status di Paul Croes na e momento aki y kico lo bira su status den futuro”.

Segun sra. Wever si bo ta un acusado na St. Maarten bo ta wordo suspendi mes ora y ora bo wordo condena bo ta wordo retira. A uza e mes un analogia akinan na Aruba pero e minister ta riba “non actief”. Kiermen e analogia no ta klop, sra. Evelyn Wever ta comenta.

MinisterDowers: No ta compronde urgencia di oposicion
Minister Arthur Dowers  di Husticia den e segundo tanda di contesta a bisa cu e no ta compronde pakico oposicion tin tanto urgencia pa kita e cartera di minister Croes mirando cu e ta un sospechoso ainda bao investigacion. “Mi a mira den pasado hopi discusion tocante integridad. Mi no ta compronde e urgencia na e momentonan aki cu partido MEP ta sinti cu mester kita entrada di minister siendo cu e minister ta wordo investiga na momentonan aki ni sikiera deteni. Nos sa cu na varios ocasion partido di oposicion a percura pa hendenan cerca di nan si por a keda cobra siendo cu nan no a ni traha.”

Un otro pregunta cu a bin na direccion di minister Dowers ta si e ta bay defende Ministerio Publico pasobra cu lo a bin cu algun critica riba nan maneho. “Ministerio Publico manera cu mi a splica na varios ocasion – ta un departamento di husticia cu tin legalmente regla con ta haci investigacion. Nan ta funciona completamente independiente for di minister di Husticia riba su investigacionnan. Mi lo sali na defensa pa nan si mi ta sinti nan ta wordo ataca, pero esaki no ta necesario aworaki.”

Tres mocion entrega
Den e debate otro topiconan tambe a bin dilanti, entre otro pa motibo cu comerciantenan di Caya Betico Croes a tuma e oportunidad di protesta (lesa mas riba e paginanan 2, 3 y 4 di e edicion aki). Manera mocion number uno di fraccion di MEP pa dicidi di elimina e parkeermeter y klem for di centro di ciudad inmediatamente. Y tambe pa habri Caya Betico Croes pa trafico inmediatamente. Mocion number dos di fraccion di MEP ta di retira confiansa den minister di labor.

Mocion number tres di fraccion di AVP ta urgi gobierno pa sigui busca forma organisatorio y fiscal, infrastructural y di actividadnan recreativo pa atrae hende y stimula benta den centro di ciudad. Entre otro introduci ‘Hybrid Shopping’ y presenta a corto plaso proyecto di ley di E-Commerce unda lo formalisa e mix di ‘Online Shopping’ y ‘Instore Shopping’ pa comercio y consumidornan local. Otro punto tabata pa laga studia e efectonan di habri Caya Betico Croes pa trafico di auto prome cu haci esaki definitivo. E di tres dictum ta pa sigui tuma tur iniciativa pa converti Caya Betico Croes y vecindario den un centro comercial cu edificionan publico, recreativo y atractivo pa comunidad y bishitantenan di Aruba.