Ora cu gobernador Ricardo Rosselló Nevares a nombra siman pasa cuatro di e shete miembronan di e asina yama ‘Comision de la Igualdad para Puerto Rico’, el a coloca e debate tocante e isla como di 51 estado, den epicentro di e discusion publico.
Cu e designacion di e ex pelotero di Grandes Ligas Iván Rodríguez, ex-presidente di senado Charlie Rodríguez y ex gobernadornan Carlos Romero Barceló y Pedro Rosselló González como legisladonan di e isla dilanti Congreso Mericano pa promove e opcion, tambe a resucita e pregunta: ta existi condicion pa Puerto Rico bira un anexo di Estadonan Uni?
Pa varios estadista, ta cuestion di tempo. Nan ta sigura cu e tereno ta fertil pa un propuesta di admision cu lo concede estadidad na Puerto Rico. P’esey nan ta kere cu e comision recien crea lo ta e simia cu por bira e strea di e di 51 estado.
Pero, pa analistanan di e realidad politico di Puerto Rico, ta existi barera cultural y historico cu ta haci e transicion dificil.
“Desde punto di bista huridico, no tin impedimento pa Congreso admiti Puerto Rico como estado di e Union,” Efrén Rivera Ramos, catedratico di e Scol di Derecho di Universidad di Puerto Rico, ta bisa.
Articulo IV, Seccion 3, di Constitucion di Estadonan Unido ta concede Congreso e facultad di admiti estado nobo. A base di esaki, e congresistanan por aproba un ley cu ta facilita esaki, y ta establece e termino y condicionnan di e admision, como tambe un periodo di transicion.
“E problema ta politico. Un cos ta cu Congreso por admiti Puerto Rico como estado y otro cos ta si nan kier hacie. No tin un derecho di ser admiti como estado. Esey ta depende di e boluntad politico di Merca, traves di Congreso,” e ta specifica.
Pa e abogado constitucionalista, e reto pa esunnan cu ta faborece e status di estado ta con pa inclina e boluntad ey na nan fabor. Prome cu logra esey nan lo mester supera obstaculo grandi, manera e situacion economico grave di e isla, cu ta pasando den un situacion di bancarota pa renegocia su debe publico di mas di $ 69.000 miyon.
“Te unda Puerto Rico por converti su mes den un estado economicamente viabel, tumando na cuenta e diferencianan existente den termino di capacidad propio di produccion, entrada publico, diferencia den standard di bida y otro factor importante? Conta riba un aumento di fondonan federal no lo ta suficiente pa e proposito ey.”
Tambe tin e cuestion cultural. E Portoriqueño ta papia Spaño y ta pega na su raiznan isleño.“Si por bisa cu Merca a converti den un sociedad multicultural, esey ta un cos. Pero otro hopi distinto ta pa dicidi di converti den un estado plurinacional… Estadonan Uni lo ta absorbiendo un nacion, esun Portoriqueño, como parti di e estado cu nos ta yama Estadonan Uni di America,” Rivera Ramos ta afirma.
E diferencianan cultural aki por genera reclamo persistente di autodeterminacion cultural como pueblo cu un identidad propio similar na loke ta pasa na Quebec, Canada, na Catalunya, Spaña o Escocia, na Gran Bretaña.
Coincidiendo cu e posicion aki, e ex secretario di Estado y ex alcalde di San Juan, Héctor Luis Acevedo, ta opina cu e awor ta e “peor momento” pa pidi e status di estado, pa falta di viabilidad economico di e isla y e brecha cultural cu Estadonan Uni. E situacion precario di e isla lo ta un impedimento pa paga impuesto federal, un obligacion di tur estado.
