Cu hopi menos publico compara cu e reunion di e dia anterior tocante cambio den Codigo Civil, ayera a tuma luga e reunion suspendi cu topico e maneho den otorgamento di tereno erfpacht di ministro encarga cu Infrastructura.
Na turno tabata e ministro pa contesta despues cu e prome tanda a cuminsa diamars ultimo. E reunion a bay den un ambiente bastante tumulto. Durante un intervencion di mas di cinco ora, e ministro no a limita su mes na contesta e preguntanan haci, pero a bay den contra atake, treciendo varios ehemplo dilanti di caso den pasado cu na su aparece no tabata cuadra cu bon gobernacion. Esaki a hiba na un serie di intervencion di parti di oposicion loke tambe a contribui na e sesion maratonico. Tambe e ministro a uza e oportunidad di trece dilanti cierto asuntonan, cu ta duna un bista interesante pero no necesariamente agradabel pa tende.
Asina por ehemplo e ministro a conta cu den e contamento y midimento di e terenonan cu ainda ta disponibel pa emiti pa trahamento di cas, nan no por a yega na mas di 1000 tereno cu por reparti den e aña of e proximo par di añanan. Esaki naturalmente, cu un lista di espera di sigur 11.000 peticion no ta bon noticia. Pa e ministro esaki tabata motibo pa mustra tambe riba e necesidad pa reconsidera y adapta e ley di ordenansa teritorial (ROP), pa por otorga mas tereno pa traha cas, pero cu awor ainda ta area berde cu prohibicion di construccion. Esaki naturalmente lo bay bira un punto di debate serio, y cu sin duda lo bay obliga na tuma decision duro, scogiendo entre conserva naturalesa y ofrece luga di biba na un poblacion creciente.
Tambe ta e intencion pa adapta e ley di ROP pa por haci posibel cierto proyectonan, entre otro e creacion di un hotel den area proteha di mangel na Pos Chiquito (Isla di Oro), cu tambe lo bira un tema bastante controversial. Di su banda ministro a enfatisa cu e ta kere cu tin suficiente garantia cu e desaroyadonan di e hotel no lo toca nada cu ta e vegetacion original. Ta conoci di organisacionnan ambientalista cu nan tin otro pensamento den esaki.
Minister no ta contesta pregunta
Pa loke ta e preguntanan clave cu oposicion a haci encuanto e casonan di entre otro Deshaun Development VBA y Charm Rock Development NV (Bubali Plas), unda ta cuestiona e manera di duna aprobacion. Den e ultimo caso hasta ta trata di un compania cu no tabata existi tempo cu a haya aprobacion di e ministro. Ministro no a duna un contesta concreto, asina en todo caso oposicion tabata opina, y inmediatamente despues di su contesta, lider di partido MEP y otro miembronan di e fraccion geel a ripiti su preguntanan cu segun su persona mester clarificacion ainda.
Green Corridor
Banda di e proyectonan pa tereno comercial y e otorgamento di tereno pa amigonan politico, tabatin preguntanan tambe riba e Green Corridor. E echo cu e director di DOW a declara den prensa cu DOW no ta responsabel pe proyecto aki, aki a trece hopi insiguridad riba kende e ora ta responsabel. Siguramente cu e proceso di trabou ta asina leu caba. E siman aki por mira mas kapmento tambe di mangel na Spaans Lagoen unda e brug nobo lo bin pronto (riba potret).
Otro pregunta ta kende ta controla e calidad di e trabou haci. Manera na Mahuma y e rotonde unda por mira tambe cu e poco yobida di e ultimo dianan ya a daña parti di construccion (riba potret tambe).
Presidente di parlamento a conta cu mas cu 30 pregunta ora a keda sin contesta y a dicidi di suspende e reunion te dia 14 di september, pa 10 or di mainta. Palabra lo ta na e parlamentarionan cu ta desea di hiba palabra, pa despues ministro bolbe den segunda tanda. Tratamento di eventual mocion ta sigui despues. Te awor tin un mocion riba mesa, entrega pa Glenbert Croes, den cual ta propone pa laga Contraloria General haci un investigacion den e sistema di procesa peticion pa tereno.
