Debate riba ley di Serlimar lo sigui mañan; Expectativa riba cambionan cu lo introduci den ley di Serlimar

Mañan lo continua cu e di dos ronda di e debate cu tin di haci cu e cambionan cu gobierno di Gabinete Wever-Croes a introduci den e ley di Serlimar di 2005.

E cambionan aki a produci hopi pregunta for di tur fraccion di e constelacion politico den Parlamento (MEP, AVP, POR, RED). Pero tambe un polarisacion den comunidad alimenta pa e diferencia cu a surgi entre e interesnan di un empresa estatal, Serlimar y e interesnan di e empresanan di e sector priva, Ecotech y EcoGas.

Durante e periodo di receso y posponemento di e debate di e ley di Serlimar, informacion ta circula di e lobbymento cu ta tumando luga pa asina por yega na un consenso entre e miembronan di e tres fraccion di e coalicion di gobierno (MEP-POR-RED) pa aproba unanimamente e ley aki. Ya cu no tur a keda satisfecho cu e contenido di e ley aki, preguntanan a wordo formula sin haya contesta satisfactorio pa nan riba e cambionan cu a wordo introduci den e ley di Serlimar. Pues ta wordo spera cu den e debate di mañan lo bin mas cambio den e ley di Serlimar cu lo por cambia loke gobierno originalmente kier a bin cune.

Amienda.
Di su banda ya caba minister encarga cu Serlimar, Otmar Oduber (POR), a bisa cu e por sinti for di sala di Parlamento cu nan kier bin cu cierto cambionan. Te hasta e mes a splica na nos organo legislativo pa kita e articulo 6 di e ley, si den cierto momento mester kita for di mesa e discusion completo riba incinerator.

E mandatario a mustra cu e no tin niun problema pa kita e articulo menciona, ya cu ta wordo bisa cu e cambio di ley di Serlimar tin como meta pa bin cu un incinerator. Si Parlamento kier bin cu e eliminacion di e articulo 6 di e ley di Serlimar riba amienda, e ta ‘welcome’ segun e mandatario a laga sa. Nan ta puntonan cu a bin den discusion durante e tratamento di e ley dia 2 di october ultimo, pero ora cu e reunion continua, comunidad lo por mira cual otro cambionan lo bin padilanti rond di e ley controversial aki.

A pesar cu e mandatario a yega di bin cu algun nota di cambio, igualmente fraccion di MEP a anuncia cu lo bin cu algun amienda. E amienda ta pa bin cu un beslag memey di aña pa gobierno no warda te final di aña pa haya un cuenta anual di Serlimar, sino cada seis luna. Cada 6 luna e beslag aki gobierno mester mand’e pa Parlamento.

Nota di Cambio.
E mandatario a declara cu tin dos nota di cambio cu ta aclaria algun punto y trece algun cambio den e ley di Serlimar. El a bisa cu e tarifanan a keda mesun cos, pero si a bin un clarificacion den e tarifanan. Ta asina cu inicialmente tabata para den e ley, cu for di e 25 florin pa luna cu comunidad ta paga pa recogemento di sushi, kico ta e parti cu ta bay pa mantencion di limpiesa di pais Aruba y e maneho di desperdicio di sushi di Aruba. Anteriormente e tabata 7,50 florin pa recoge sushi y 17,50 destina pa e parti di maneho di desperdicio. Den e nota di cambio a bin cu otro distribucion di e 25 florin cu ta nifica un cambio grandi: 10 florin ta bay pa e parti di maneho di sushi y 15 florin pa e parti di recoge e sushi.

Mas cambionan e mandatario a bin cune den su nota di cambio. Un di nan ta di haci cu companianan cu ta registra na Camara di Comercio (KvK) cu anteriormente tin cu paga un impuesto riba desperdicio (afvalstoffenheffing) tambe a wordo exonera di dje. Tambe tin un exoneracion pa e fundacionnan caritativo, pero mester mustra esaki den nan statuto. Otro cambio tin di haci cu si bo tin un compania registra na KvK den e mesun adres cu bo residencia, eynan tambe tin cierto exoneracion y revision. E ta wordo reduci te cu dos compania, pero si bo tin mas cu dos compania den e mesun adres di cas, e ta wordo completamente exonera. E caso aki ta conta mas bien pa e tipo di compania Trustkantoor cu ta carga negoshinan di otro hendenan cerca nan.

Tin mas cambionan; por ehempel den e ley existente di 2005 ta bisa cu e minister, ki ora cu kier, por cambia e prijs di Serlimar. Den e ley cu Parlamento lo sigui trata mañan, un cambio tin di haci cu e minister no por cambia prijs gewoon, sino unicamente cada 3 aña, si ta necesario. Pero e mester ta segun e cifranan di Oficina Central di Estadistica (CBS) relaciona, entre otro, cu costo di bida.