Debate riba criminalidad ta caba atrobe den mustra dede

Sala di Parlamento durante OLV #17 ~ Topico criminalidad

Criminalidad ta keda un topico popular den parlamento pa discuti, siguramente cu e ultimo añanan por mira mas atraconan unda ta uza arma. Y tambe e casonan di ladronicia. Sinembargo e debate ayera no a yega mucha mas leu cu e partidonan ta keda mustra dede na otro sin cu por scucha solucionnan.

Minister di Husticia, Arhur Dowers a señala cu e topico di criminalidad ta uno di preocupacion mundial, y e ta lamenta cu e tipo di debate aki no a haya su debido dimension durante e reunion publico di ayera.

“Siguridad ta un di e topiconan cu ta mundialmente un echo. Si bo ta wak e cantidad di biyones cu ta wordo hinca di e pais mas grandi te cu e pais mas chikito. Y e discusion cu tin fundamental ariba siguridad den mundo, mi ta kere cu ta un berguensa nacional cu bo tin cada bes un grupo di hende den oposicion cu ta ataca cuerpo policial, ministerio publico, hues, ataca tur hende cu ta traha pa tene nan mes den siguridad”, el a declara na Bon Dia Aruba.

Algo cu a resalta den e debate aki ta cu parti di dje a bay den un dimension politico den bista di eleccion venidero. Minister Dowers a bisa cu den su maneho nan ta hibando un lucha tenaz den contra di tur loke ta ilegal. Tambe el a indica cu Ministerio Publico (OM) y Cuerpo Policial ta wordo fortifica pa realisa nan tarea; y nan inverti anualmente  un suma di 60 miyon florin mas riba tereno di husticia cu den tempo di gobierno di MEP.

Un punto cu a wordo cuestiona ta e inversion den scol di polis y e reclusion di mas polis pa fortalece e cuerpo uniforma aki. Sinembargo e mandatario a reacciona bisando cu den su maneho nan a bin cu casi 150 polis adicional; aunke tin algun di nan cu a bay cu pensioen.

E ta haya cu si e miembronan di oposicion no tin sentimento pa nos pueblo; y si nan kier traha na bienestar di nos comunidad, nan mester bin cu sugerencianan riba cosnan cu nan por yuda cu ne; y no bay den e mesun retorica tradicional di “politica barata”.  E ta kere cu husticia e unico forma cu e por prevalece ta, si cada un di nos ta duna nos contribucion pa ataca e problema di criminalidad. E ta haya cu den e mesun fraccion di MEP tin discrepancia, ya cu e parlamentario Juan Thijsen mes no ta sostene e pensamento di e lider di partido.

Minister di Husticia a  bisa tambe cu MEP ta promente hopi cos riba siguridad cu nan no por cumpli cu nan.  Den pasando nan a bin cu un campaña di ordo y prosperidad  y “nos a topa cu e caos mas grandi den historia di nos pais den e periodo ey”.  Segun e mandatario Dowers, loke el a hereda tabata un cuerpo di Husticia totalmente demotiva y fractura; y el a drecha esey. Awendia e ta haya cu nos instancia di husticia ta prepara pa confronta e retonan cu ta bin den e añanan nos dilanti.

Na defensa di ex minister Rudy Croes
Parlamentario di MEP Glenbert Croes a defende e maneho cu ex minister di Husticia, Rudy Croes a hiba den gobierno di MEP. Entre otro el a bisa cu kustwacht a wordo reforsa,  helicopter di polis a keda introduci, te hasta radar marino a wordo uza. “Bo por critica e minister di Husticia di MEP anterior cuanto bo kier… pero por lo menos e minister di Husticia di MEP a durf haci algo”, el a bisa. Mientras el a indica cu pueblo ta sinti cu minister Dowers no ta tribi suficiente pa “actua duro cu man duro pa combati criminalidad.

Parlamentario Croes a bisa cu criminalidad ta un di e preocupacion mas grandi cu ta biba na Aruba actualmente. El a bisa cu den e bishita cu nan ta realisa den cuadro di eleccion venidero di dia 22 di september nan ta tende den tur hogar cu e preocupacion number 1 ta e “insiguridad y e criminalidad cu ta asotando nos comunidad; y p’esey nan a solicita e reunion urgente aki.

25 atraco den prome kwartaal
El a cita cu aña pasa nan a kere cu record a wordo bati cu 60 caso di atraco; sinembargo den e prome kwartaal di 2017, ya caba 25 atraco a registra, y e pronostico lamentabel ta cu e por subi di 60 pa 120 caso di atraco pa 2017. Mientras cu nan ta sinti cu minister Dowers no ta combibiendo cu e preocupacion grandi aki. Segun e parlamentario tin hopi rapport den lachi riba e tema di prevencion y e ta urgi pa tene cuenta cu nan.

El a trece cifranan cu polis a trece dilanti den nan presentacion di januari ultimo den parlamento. Parlamentario Croes a indica cu e cifranan aki a mustra cu mayoria di atraconan cu ta wordo cometi na Aruba tin un arma di candela involucra. El a agrega cu ta increibel e cantidad di arma di candela cu ta drentando na Aruba. Y di biaha el a puntra kico ta wordo haci pa impedi cu arma di candela no solamente pa stop di drenta nos pais; sino cu mester kita e armanan cu ta circula ariba caya.

El a puntra minister Dowers cual ta su maneho riba e tereno aki sigurando cu riba presupuesto di polis no tin placa poni pa prevencion. Aunke gobierno a bisa cu lo pone disponibel 10 miyon florin pa husticia; e kier sa cuanto ATA lo pone disponibel pa ministerio di Husticia; y cuanto di e placa aki lo wordo destina pa prevencion.

Critica sin echo real
Di su banda parlamentario Lorna Jansen-Varlack di AVP a bisa cu den e debate di ayera nos por a tende e mesun critica, “argumento y cantaleta” cu nos ta scucha añanan largo. E ta haya cu pueblo ta puntra su mes: Ki dia oposicion ta bay “stop cu nan weganan infantil”.

Parlamentario Jansen-Varlack ta haya cu oposicion ta critica so nan ta critica, sin echo real. El a agrega cu rond mundo e cifra di criminalidad ta subi y cada pais ta enfrentando e mesun situacion un mas pio cu otro; y Aruba no ta un excepcion. E parlamentario di fraccion di AVP a elogia e trabou di polis, ya cu hopi di e casonan a wordo resolvi.

E ta lamenta cu tur hende ta consciente cu acto di criminalidad ta imprevisibel. Pero loke e ta haya importante ta pa fortalece nos control social y solidaridad. Kiermen cu ora algo pasa den comunidad e mester wordo resolvi mas lihe posibel cu ayudo di henter comunidad.

E ta haya cu un di e balor cu ta bayendo perdi den nos comunidad ta esun di e control social. “Hopi biaha nos mester bay den nos fundeshi cu ta nos balornan cu ta toca nos comunidad”, el a bisa. Como politico e ta haya cu nan tin un tarea pa conscientisa pueblo pero lamentablemente tur cos ta wordo tira riba gobierno y otro instancianan. Pero –segun e parlamentario- “nos tur tin cierto responsabilidad pa loke ta pasa den nos comunidad”.